राष्ट्र बैंकले मंगलबार सार्वजनिक सूचना जारी गरी फाईनान्सको कार्यालयमा निरीक्षण गर्दा पूँजी कोष १९ प्रतिशत भन्दा बढीले ऋणात्मक रहेको, निस्क्रिय कर्जा अनुपात ८० प्रतिशत नाघेको, कर्जा केन्द्रिकरण जोखिम उच्च रहेको र चुक्ता पूँजी तोकिए अनुसार कायम नगरेको कारण समस्याग्रस्त घोषणा गरिएको जनाएको छ । चालु आर्थिक बर्षको पहिलो त्रैमासको अबस्था संतोषजनक नभएको र संस्थाले पेश गरेको स्पष्टिकरण समेत चित्तबुझ्दो नरही संस्था, निक्षेपकर्ता, सर्वसाधारण लगानीकर्ताहरुको हितको लागि संस्थालाई समस्याग्रस्त घोषणा गरी ६ महिना भित्र सुधार गर्न १२ बुदे निर्देशन दिईएको राष्ट्र बैंकले जनाएको छ ।
राष्ट्र बैंकले फाईनान्सको चुक्ता पूँजी १५ करोड रहेकोमा तोकिए बमोजिम २० करोड कायम गर्न, , थप निक्षेप संकलन नगर्न, परिपक्कव भएका निक्षेप नविकरण नगर्न, थप कर्जा प्रबाह र नबिकरण नगर्न, फिर्ता गर्नुपर्ने निक्षेप फिर्ता गर्न र नयाँ शाखा नखोल्न निर्देशन दिएको छ । त्यसैगरी निस्क्रिय कर्जा अनुपात ५ प्रतिशत कायम गर्न, लाभांश घोषणा र वितरण नगर्न पनि फाईनान्सलाई निर्देशन दिईएको छ ।
अरुण फाईनान्स(NFS)ले केही समय अघि प्रोगेशिभ फाईनान्स PROFL र ललितपुर फाईनान्स LFC सँग मर्जमा जाने सम्झौता गरे पनि बीचमै तुहिएको थियो । फाईनान्सले प्रकाशित गरेको यस आर्थिक बर्षको पहिलो त्रैमासको बित्तीय बिबरण अनुसार जगेडा कोष १४ करोड ६५ लाखले ऋणात्मक छ भने १४ करोडको हाराहारीमा सर्वसाधारणको निक्षेप छ । संस्थाको मर्ज सम्झौता हुनु अघि प्रति कित्ता शेयर ५१ रुपैयाँमा कारोबार भएको थियो ।