शेयर बिक्री सम्बन्धी सबै लिखत भए पनि औपचारिक स्वीकृतिका लागि राष्ट्र बैंक र अर्थ मन्त्रालयमा फाईल गएको बुझिएको छ । नागरिक लगानी कोषसम्बन्धी कानुनमा संस्थापकले शेयर बिक्री गर्दा सरकारको स्वीकृति लिनुपर्ने प्रावधान रहेकाले स्वीकृतिका लागि फाईल सम्बन्धित निकायमा गएको हो ।
नेपाल बैंकले प्रति कित्ता दुई हजार आठ सय रुपैयाँ मूल्यमा नागरिक लगानी कोषको शेयर बेचेको सुत्रको भनाई छ । यो शेयर बिक्रीबाट नेपाल बैंकले एक अर्ब ११ करोड भन्दा बढी रकम प्राप्त गर्नेछ । सो रकम जगेडा कोष घाटा पुरा गर्न सहयोगी भई बैंकको अबस्था सबल हुनेछ । नागरिक लगानी कोषले यस बर्ष बितरण गरेको ३० प्रतिशत बराबरको बोनस शेयर भने नेपाल बैंकसँगै हुने बुझिएको छ । सम्बन्धित सरकारी निकायले स्वीकृति दिएमा यही त्रैमासिक बित्तीय बिबरणमा नागरिक लगानी कोषको शेयर बेचेको रकम देखिने बताईएको छ ।
नेपाल बैंकले आफ्नो नाममा रहेको नेपाल ईन्स्योरेन्सको १३ लाख ४२ हजार कित्ता शेयरको धेरै भाग सर्वसाधारणलाई बेचेर केही थोरै हिस्सा मात्र राख्ने सोचाई बनाएको सुत्रको भनाई छ । नेपाल ईन्स्योरेन्सको शेयर राष्ट्रिय बाणिज्य बैंकले नेपाल ईन्भेष्टमेन्ट बैंकको संस्थापक शेयर बेचेको मोडलमा बेचिने तयारी भईरहेको छ । यसबाट पनि बैंकलाई एक अर्ब भन्दा बढी रकम आम्दानी हुने आँकलन गरिएको छ ।
अर्कोतर्फ नेपाल बैंकले घरजग्गा बेचेको मध्येको केही रकम यस आर्थिक बर्षको तेस्रो त्रैमासिक प्रतिबेदनमा समाबेश हुने भएको छ । बानेश्वरको जग्गा बेचेको रकम दोस्रो त्रैमासमा देखाई सकिएको भए पनि चितवन लगायतका स्थानमा जग्गा बेचेको ३० करोड भन्दा बढी रकम यस त्रैमासिक बित्रीय बिबरणमा उल्लेख हुने बुझिएको छ । अर्कोतर्फ नियमित ब्यापारबाट हुने कमाई त छदैछ ।
नेपाल बैंकले नेपाल ईन्स्योरेन्स, नागरिक लगानी कोष, तारा गाँउरिजेन्सी होटल र राष्ट्रिय वीमा कम्पनीको २६ लाख भन्दा बढी कित्ता शेयर बेच्न सरकारी संस्थाहरुसँग भित्रभित्रै छलफल चलाएको थियो ।
६ अर्ब ४६ करोड चुक्ता पूँजी रहेको नेपाल बैंकको जगेडा कोष १ अर्ब ५४ करोड घाटामा छ भने पूँजी कोष ९.११ छ ।
बैंकले यस आर्थिक बर्षको दोस्रो त्रैमाससम्ममा एक अर्ब ४ करोड खुद नाफा गरेर प्रति शेयर आम्दानी ३२ रुपैयाँ कायम गरेको छ । पहिले खराब कर्जाले थलिएर झण्डै बिघटनको डिलमा पुगेको नेपाल बैंकको अहिले निस्क्रिय कर्जा अनुपात ३.८५ मात्र छ ।
बैंकले जग्गा र शेयर बिक्रीबाट आएको रकमले जगेडा कोष धनात्मक बनाएरमा अरु नियमित रुपमा हुने आम्दानीबाट बोनस बाड्न सक्ने हैसियत बनाउने आशा गरिएको छ । बैंकले राष्ट्र बैंकले तोकेको चुक्ता पूँजी ८ अर्ब बनाउन झण्डै २४ प्रतिशत हकप्रद शेयर जारी गर्ने प्रस्ताव गरेको छ ।
राष्ट्र बैंकले सरकारी रकम ठूलो परिमाणमा निक्षेप लिने नेपाल बैंकको निक्षेप लागत न्युन हुँदा डुबेको कर्जा मात्रै उठाएमा पनि यसको खुद नाफालाई अरु बैंकले भेट्टाउन नसक्ने हुनसक्छ ।
