ग्रीन डेभलपमेन्ट बैंकले निष्काशन गरेको साधारण शेयरमा आवेदन दिने आज अन्तिम दिन हो । अधिल्लो दिन अर्थात मंगलबार साझँसम्म बैंकको शेयरमा ५६ गुणा बढीको आवेदन परेको छ । उता नेशनल माइक्रो फाइनान्स वित्तीय संस्थाले ३ लाख कित्ता साधारण शेयर निष्कासनका लागि सोमबार धितोपत्र बोर्ड बाट स्वीकृति पाएको छ ।

ग्रीन डेभलपमेण्ट बैंकको शेयर निष्काशन तथा बिक्रि प्रबन्धक एनआइबिएल क्यापिटलले दिएको जानकारी अनुसार मंगलबार मात्रै १ अर्ब ७ करोड रुपैंयाको आवेदन परेको छ । मंगलबार मात्रै बैंकको शेयरमा २६ गुणा बढीको आवेदन परेको क्यापिटलले जनाएको छ । कर्मचारी तथा संस्थागत लगानीकर्तालाई बाँडिएको शेयरको समेत हिसाव गर्दा मंगलबार २३ गुणा बढी आवेदन परेको हो ।

त्यस अघिका २ दिनमा बैंकको शेयरका लागि १ अर्ब २८ करोड रुपैंया अर्थात २८ गुणा बढी आवेदन परेको थियो । कर्मचारी तथा संस्थागत लगानीकर्तालाई बितरण गरेको बाहेक ती २ दिनमा परेको आवेदन ३० गुणा भन्दा बढी हो । कर्मचारीलाई बाँडिएको शेयर सहित ३ दिनमा बैंकको शेयरमा ५१ गुणा बढी आवेदन परेको हो भने कर्मचारी र संस्थागत लगानीकर्तालाई बाँडेको बाहेकका आधारमा ५६ गुणा बढी आवेदन परेको हो । बैंकको शेयर निष्काशन बुधबार बैंकिंग समय पश्चात बन्द हुनेछ । शेयरका लागि न्युनतम ५० देखि अधिकतम १० हजार कित्तासम्मका लागि आवेदकले मुलुकभरका विभिन्न स्थानबाट आवेदन दिन सक्नेछन् ।

बागलुङमा मुख्य कार्यालय रहेको ग्रीन डेभलपमेण्ट बैंकले १० करोड रुपैंया चुक्ता पूँजी पुर्याउन ४ लाख ५० हजार कित्ता साधारण शेयर निष्काशन गरेको हो । बैंकले १ सय रुपैयाँ अंकित दरका ४ लाख ५० हजार कित्ता साधारण शेयर निष्काशन गरेको हो । बैंकले बागलुङ, म्याग्दी र कास्की जिल्लामा कार्यक्षेत्र बिस्तार गरी वित्तीय सेवा दिंदै आएको छ ।

बैंकका कर्मचारीका लागि ९ हजार तथा संस्थागत लगानीकर्ताहरुका लागि २२ हजार ५ सय कित्ता शेयर यस अघि नै सुरक्षित गरिएको बैंकको साधारण शेयर निष्काशन छिटोमा जेठ २६ गते र ढिलोमा असार ५ गते बन्द हुने एनआइबिएल क्यापिटलले जनाएको छ । अन्तिम दिन ठुला लगानीकर्ताले धेरै रकमको आवेदन दिने भएकाले आइपिओको आवेदन झण्डै सय गुणाको हाराहारीमा पुग्ने आंकलन गरिएको छ ।

कस्तो छ बैंकको वित्तीय अवस्था ?

बैङकको अधिकृत पूँजी ५० करोड, जारी पूँजी १० करोड र चुक्ता पूँजी ५ करोड ५० लाख रुपैयाँ रहेको छ । साधारण शेयर निष्काशन पश्चात बैंकमा ५५ प्रतिशत संस्थापक तथा ४५ प्रतिशत सर्वसाधारको लगानी पुग्नेछ । संस्थापक तर्फको सम्पूर्ण रकम चुक्ता भइसकेको र साधारण शेयर जारी गरेपछि बैंकको चुक्तापूँजी १० करोड रुपैयाँ पुग्नेछ । ३३ करोड ६६ लाख रुपैंया निक्षेप संकलन गरेको बैंकले २६ करोड ९८ लाख रुपैंया कर्जा प्रवाह गरेको छ ।

बैंकले गत आर्थिक वर्षमा ११ लाख रुपैंया खुद नोक्सान व्यहोरेकोमा चालु आर्थिक वर्षको ९ महिनामा त्यो नोक्सानलाई नाफामा रुपान्तरण गरि १३ लाख रुपैंया खुद नाफा कमाएको छ । अहिले बैंकको जगेडा कोष ८१ लाख ९३ हजार रुपैंयाले नकारात्मक छ ।

कति रकम आवेदन गर्ने ?

इक्रा नेपालले ग्रीन डेभलपमेण्ट बैंकको साधारण शेयरलाई रेटिंग ४ दिएको छ । यसले बैंकको वित्तीय अवस्था कमजोर रहेको जनाउँछ । बैंकको वित्तीय अवस्था त्यति सन्तोषजनक नभएको र सर्वसाधारणमा बिक्रीमा ल्याइएको शेयर संख्या कम भएकाले लगानीकर्ताले धेरै रकम फसाउनु फाइदाजनक देखिदैन । निष्काशन गरेको शेयर संख्या कम हुनुका साथै आवेदक धेरै हुने भएकाले शेयर बाँडफाँडमा गोलाप्रथा हुने सम्भावना छ ।

नेशनल माइक्रो फाइनान्सको आइपिओ स्वीकृत

नेशनल माइक्रो फाइनान्सलाई साधारण शेयर निष्काशनका लागि नेपाल धितोपत्र बोर्डले स्वीकृति दिएको छ । वित्तीय संस्थाले यहि जेठ २४ गते धितोपत्रबोर्डबाट आइपिओ निष्काशनको लागि स्वीकृति पाएको हो । आईपिओ निष्काशनका लागि बोर्डबाट स्वीकृति पाउने यो सबैभन्दा पछिल्लो कम्पनी हो । कम्पनीले ३ करोड रुपैयाँ बराबरको ३ लाख कित्ता साधारण निष्काशन गर्ने छ । जसका लागि कम्पनीले एनआईबिएल क्यापिटलाई शेयर निष्काशन तथा बिक्री प्रबन्धकमा नियुक्त गरिसकेको छ । कम्पनीले स्वीकृति पाए पछि साधारण शेयर निष्काशनका लागि आह्वानपत्र जारी गर्ने तयारी सुरु गर्न लागेको क्यापिटलले जनाएको छ ।

....................................................................................................................................................................

....................................................................................................................................................................

मेरो लगानी अब सबै स्मार्टफोनमा ! एण्ड्रोइड मोवाइल एप्सका लागि यहाँ क्लिक गर्नुहोस् । एप्पलको आइफोन तथा आइप्याडका लागि यहाँ क्लिक गर्नुहोस् । तपाईँ मेरो लगानीका प्रत्येक अपडेट फेसबुक, ट्वीटर र गुगल प्लस मार्फत पनि पाउन सक्नुहुन्छ ।

....................................................................................................................................................................

१७ लाख ६१ हजार कित्ता साधारण शेयर निष्काशन गर्ने सिइडिबी हाइड्रोको तयारी, एन.सि.एम. मर्चेन्टसँग