बैंकले साधारण सभा प्रयोजनका लागि पुस छ गतेदेखि सेयरधनी पुस्तिका बन्द गर्दैछ । बैंकले प्रस्ताव गरेको बोनस सुरक्षित गर्नका लागि लगानीकर्ताले पुस पाँच गते मंगलबारसम्ममा सेयर खरिद गर्नु पर्ने हुन्छ । प्रस्तावित तीन बराबर एक कित्ता हकप्रद सेयर जारी गर्न साधारण सभाले अनुमति दिएर धितोपत्र बोर्डबाट स्वीकृत भए पछि मात्र अर्को पटक शेयरधनी दर्ता पुस्तिका बन्द हुनेछ । अहिले भएको शेयरधनी दर्ता पुस्तिका बन्दले बोनस बोनस सुरक्षित गर्दै साधारण सभामा भाग लिने आधार मात्र दिन्छ ।
अहिले २ अर्ब ६६ करोड रुपैंया चुक्ता पूँजी रहेको बैंकले साधारण सभाबाट बोनस पारित गरी बितरण गरे पश्चात चुक्ता पूँजी ४ अर्ब ५२ करोड रुपैंया नाघ्नेछ । बोनस बितरण पश्चात कायम हुने पूँजीबाट बैंकले १ अर्ब ५६ करोड रुपैंया बराबरको हकप्रद तीन कित्ता बराबर एक कित्ताको अनुपातमा निष्काशन गर्ने प्रस्ताव पनि साधारण सभाले अनुमोदन गर्दैछ । उक्त हकप्रद निष्काशन गरी यसै आर्थिक वर्षको अन्त्यसम्मा चुक्ता पूँजी ६ अर्ब तीन करोड रुपैंयाको हाराहारीमा पुर्याउने बैंकको लक्ष्य छ ।
बोनस तथा हकप्रद निष्काशन पश्चात आगामी आर्थिक वर्षको अन्त्यसम्ममा बैंकले थप १ अर्ब ९७ करोड रुपैंया पूँजी वृद्धि गर्नुपर्ने हुन्छ । बैंकको जगेडा कोषमा अहिले नै ६ अर्ब ३८ करोड रुपैंया सञ्चित भएका कारण आगामी वर्ष बैंकले चालु आर्थिक वर्षको कमाईबाट बोनस बितरण गरेर नै चुक्ता पूँजी ८ अर्ब पुर्याउने देखिन्छ । गत आर्थिक वर्षमा १ अर्ब ७३ करोड रुपैंया कमाई गरेको बैंकले चालु आर्थिक वर्षको पहिलो त्रैमासमा नै ५१ करोड रुपैंया खुद नाफा गरी प्रतिशेयर आम्दानी ७७ रुपैंया १३ पैसा कायम गरेको छ ।
बैंकले साधारण सभामा अन्य कुनै उपयुक्त संस्थासँग मर्ज तथा एक्विजिशनका लागि पनि मार्ग प्रशस्त गर्ने प्रस्ताव पारित गर्दैछ । बैंकले सर्वसाधारण सेयरधनीका तर्फबाट प्रतिनिधित्व गर्ने दुई जना सञ्चालकको निर्वाचन पनि गर्दैछ ।