राष्ट्र बैंकले शुक्रबार सार्वजनिक गरेको चालु आर्थिक बर्षको पहिलो चार महिना अर्थात कात्तिक मसान्तसम्मको मुलुकको वर्तमान आर्थिक तथा वित्तीय प्रतिवेदनमा मार्जिन कर्जा बढेको उल्लेख छ ।
कात्तिक मसान्तसम्ममा बैंक तथा वित्तीय संस्थाहरुले सेयरको धितोमा प्रवाह गरेको मार्जिन प्रकृतिको कर्जा कुल कर्जाको २.२ प्रतिशत अर्थात ३९ अर्ब ३० करोड रहेको छ । जून गत असोजमसान्तको तुलनामा ७२ करोड रुपैयाँले बढी हो ।
तर राष्ट्र बैंकले सिमा तोके भन्दा निकै कम मात्र मार्जिन कर्जा बैंक तथा बित्तीय संस्थाहरुले प्रबाह गरेका छन् ।
असोजसम्ममा बैंक तथा वित्तीय संस्थाहरूले सेयरको धितोमा प्रवाह गरेको मार्जिन प्रकृतिको कर्जा ३८ अर्ब ५८ करोड रुपैयाँ रहेको थियो ।
यसअवधिमा बैंक तथा वित्तीय संस्थाहरूको निक्षेप २०.५ प्रतिशतले बढेको छ । त्यस्तै निजी क्षेत्रतर्फ प्रवाहित कर्जा ७.४ प्रतिशत, कृषि क्षेत्रतर्फको कर्जा ५.७ प्रतिशत, औद्योगिक उत्पादन क्षेत्रतर्फको कर्जा ५.७ प्रतिशत, निर्माण क्षेत्रतर्फको कर्जा ७.३ प्रतिशत, थोक तथा खुद्रा व्यापारतर्फको कर्जा ७ प्रतिशत, सेवा उद्योगतर्फको कर्जा ८.१ प्रतिशत र यातायात, सञ्चार तथा सार्वजनिक सेवा क्षेत्रतर्फको कर्जा १०.१ प्रतिशतले बढेको छ ।
२०७३ कार्तिकसम्ममा बैंक तथा वित्तीय संस्थाहरूको लगानीमा रहिरहेको कर्जामध्ये ६०.७ प्रतिशत कर्जा घर जग्गाको धितोमा र १४.९ प्रतिशत कर्जा चालू सम्पत्ति (कृषि तथा गैर–कृषिजन्य वस्तु) को धितोमा प्रवाह भएको छ । अघिल्लो वर्षको सोही अवधिमा यस्तो धितोमा प्रवाहित कर्जाको अनुपात क्रमशः ५९.७ प्रतिशत र १२.६ प्रतिशत रहेको थियो ।
२०७३ कात्तिकसम्ममा बैंक तथा वित्तीय संस्थाहरूको कुल लगानीमा रहेको कर्जामध्ये घरजग्गा क्षेत्रमा २ खर्ब ७० अर्ब ४० करोड (प्रति ग्राहक रु. १ करोडभन्दा कमको १ अर्ब ५५ अर्ब ६७ करोडको आवासीय घरकर्जा समेत) रहेको छ । उक्त कर्जा बैंक तथा वित्तीय संस्थाहरूबाट प्रवाहित कुल कर्जाको १५ प्रतिशत हुन आउँछ ।