बैंकले अग्राधिकार सेयर बाहेकको चुक्ता पूँजी ३ अर्ब ९३ करोड ७६ लाख रुपैंयाको ५० प्रतिशतले हुने १ अर्ब ९६ करोड ८८ लाख रुपैंया बराबरको हकप्रद निष्काशन गरेको थियो । जसमध्ये एक करोड कित्ता अर्थात एक अर्ब रुपैयाँ सरकारले जम्मा गरेको छ ।
सर्वसाधारणका लागि छुट्याइएको ९६ लाख ८८ हजार कित्ता अर्थात ९६ करोड ८८ लाख रुपैयाँ बराबरको सेयरमा ७१ करोड रुपैयाँ बराबरको आवेदन परेको बैंकको धितोपत्र तथा बिक्री प्रबन्धक एस क्यापिटलले जनाएको छ ।
क्यापिटलका प्रमुख कार्यकारी पूर्णचन्द्र दाहालका अनुसार करिब ९७ करोड रुपैयाँ बराबरको सेयर निश्काशन भएकोमा ७१ करोड रुपैयाँ बराबरको आवेदन परेको छ । बैंकका दुई लाख सेयरधनीहरु भएपनि एक लाख भन्दा केही बढीले मात्र आवेदन बुझाएका छन् ।
कृषि बिकास बैंकले पहिले गाउँ गाउँमा ऋणीहरुलाई सेयर बितरण गरेको थियो । ती मध्येका कयौंको मृत्यु भएको र नजिकका हकवालाले हकप्रद किन्ने प्रक्रियामा चासो नदिदा पनि आबेदन कम भएको हुनसक्ने संभावना ब्यक्त गरिएको छ ।
देशभर २५० शाखा संजाल रहेको कृषि बिकास बैंकले जिल्ला जिल्लाबाट हकप्रदको आबेदन संकलन गरेको थियो, त्यो राजधानी आईपुग्ने क्रम जारी छ । अहिले आबेदकले बुझाएको रकमको हिसाबका आधारमा २७ लाख कित्ता हकप्रद नबिकेको आँकलन गरिएको हो । ती आबेदनपत्रहरु काठमाडौ आई पुगेर रुजु गरिएपछि मात्र आबेदन नगरिएको वास्तविक सेयर संख्या पत्ता लाग्ने जनाईएको छ ।
ठूलो मात्रामा हकप्रदमा आवेदन नपर्नु लगानीकर्ताको वेवास्ता भएको दाहालको भनाई छ। सूचना नपाएर हकप्रद भर्न छुटेको भन्न मिल्दैन- दाहालले भने ।
बैंकले चुक्ता पूँजी ८ अर्ब रुपैंया बनाउने क्रममा ५० प्रतिशत हकप्रद पश्चात २० प्रतिशत बोनस बितरण गर्ने पूँजी योजना राष्ट्र बैंकमा बुझाएको छ ।
उसले गत आर्थिक वर्षमा २ अर्ब ५७ करोड रुपैंया खुद नाफा गरेको थियो । चालु आर्थिक बर्षको पहिलो त्रैमासमा ४२ करोड रुपैयाँ खुद नाफा कमाएको बैंकको जगेडा कोषमा ८ अर्ब ८० करोड रहेको छ ।
चुक्ता पूँजी बढेसँग खुद नाफा र प्रति सेयर आम्दानी कायम गर्नुपर्ने चुनोति उसलाई छ । हकप्रदमा नबिकेको सेयर लिलाम गरेर कृषि बिकास बैंकले यस बर्ष झण्डै एक अर्ब थप कमाई जगेडा कोषमा जम्मा गर्नसक्ने देखिएको छ ।