यसअघि प्रभु बैंकतर्फको मात्र कारोबार फुकुवा गरेर ग्राण्डतर्फको रोकेपछि धितोपत्र बोर्डले प्रभुको पनि कारोबार रोकेको थियो ।
गत असोज १७ र १८ गते राष्ट्र बैकले प्रभु बैंकतर्फको मात्र सेयर कारोबार फुकुवा गराउँदा दुई दिन सेयर किनबेच भएको थियो । त्यतिबेला प्रभुको सेयर मूल्य १० प्रतिशतले बढेको थियो ।
नेपाल स्टक एक्सचेन्जले प्रभुको मात्र कारोबार खोल्दा सेयर मूल्य मिलानमा समस्या पर्ने भन्दै राष्ट्र बैंक र धितोपत्र बोर्डलाई समस्या समाधानका लागि आग्रह गरेपछि बोर्डको निर्देशनमा कारोबार रोक्का भएको थियो ।
राष्ट्र बैंकले ग्राण्ड तर्फको खराब कर्जाको अबस्था जटिल रहेको भन्दै ग्राण्डतर्फको सेयर कारोबार रोकेर कर्जा असुल गर्न प्रभु ब्यवस्थापनलाई दबाब दिएको थियो । बितेको तीन महिनामा प्रभु बैंकले खराब कर्जा असुलीमा उल्लखनीय प्रगति गरेको आधारमा राष्ट्र बैंकले सेयर कारोबार खोल्न अनुमति दिएको बुझिएको छ । प्रभुले कतिपय धितोहरु लिलाम गरेको छ भने लिलाम हुन नसकेकोलाई गैर बैंकिड. सम्पतिको रुपमा सकार्ने प्रक्रिया अगाडि बढाएको छ । प्रभुको ब्यवस्थापन खराब कर्जा असुली गर्न कडा रुपमा प्रस्तुत भएपछि उसको खुद नाफा पनि बढ्ने संभावना छ ।
राष्ट्र बैंकले ग्रान्डतर्फको पनि कारोबार फुकुवा गरिदिएर आउँदो साताबाट प्रभुको सेयर नियमित कारोबार हुने भएपछि झण्डै दुई बर्षदेखि पीडित बनेका ग्राण्डका लगानीकर्ता पनि लाभान्वित हुने भएका छन् ।
साविकको ग्रान्ड बैंक र प्रभु बैंक एक आपसमा गाभ्ने गाभिने कार्य सम्पन्न भई गत माघ २९ गतेदेखि प्रभु बैंक लिमिटेडको नामबाट एकीकृत कारोवार भएको थियो ।
मर्ज हुँदा ग्राण्डको ६५.५८ र प्रभुको १२१.४५ सेयर मिलान अनुपात ( स्वाप रेसियो ) कायम हुने निर्णय भएको थियो ।
चालु आर्थिक बर्षको पहिलो त्रैमासमा २८ करोड रुपैयाँ खुद नाफा कमाएको प्रभुको चुक्ता पूँजी पाँच अर्ब ८८ करोड छ । उसले चुक्ता पूँजी आठ अर्ब बनाउन ४० प्रतिशत हकप्रद जारी गर्ने प्रक्रिया अगाडि बढाएको छ । यसका लागि यही शुक्रबार उसले १५ औं बार्षिक साधारणसभा राजधानीमा गर्दैछ ।
