बिहीबार बिहान सेयर बजार खुल्नु अगावै प्राइम कमर्शियल बैंकको बोनस समायोजन हुनु पर्ने थियो । तर कारोबार सुरु भएको धेरै बेरसम्म पनि सेयर मूल्य समायोजन हुन नसकेपछि त्यो काम आइतबारसम्मका लागि थाति बसेको छ । बिहीबार यसै कारणले गर्दा प्राइम बैंकको सेयर किनबेच पनि हुन सकेन ।
यदि कुनै कारण बस उक्त दिन सामान्य लगानीकर्ताले समायोजन नभएको मूल्यमा सेयर खरिद गरेको भए उसले न त बोनस नै पाउँथ्यो, न त वास्तविक मूल्यमा सेयर नै । अनि सुरु हुन्थ्यो कारोबार उल्ट्याउने झमेला ।
आखिर किन भयो यस्तो ?
नेपाल स्टक एक्सचेञ्जले प्रत्येक कम्पनीहरुले बितरण गर्ने बोनस तथा निष्काशन हुने हकप्रदको विबरण समायोजन गर्नु पर्ने अघिल्लो दिनसम्ममा पाए पछि मूल्य समायोजन गर्दै आएको छ । त्यस्तो नभएको खण्डमा उक्त कम्पनीको सेयर कारोबार रोक्का गरेका धेरै उदाहरण यस अघि नदेखिएका हैनन् । नेप्सेका अनुसार प्राइम बैंकले निर्धारित समयमा बोनसको विबरण उपलब्ध नगराएका कारण बिहीबार सेयर मूल्य समायोजन हुन नसकेको हो ।
उता बैंकले भने आफुहरुले समयमा नै विबरण उपलब्ध गराएको दाबी गर्दै किन मूल्य समायोजन नभएको भन्ने सम्बन्धमा आफु जानकार नभएको बताएको छ । बैंकका कम्पनी सचिव सन्तोष बरालले आफुले नै नेप्सेमा बैंकको बोनसको विबरण गत बुधबार मध्यान्ह तीन बजे उपलब्ध गराएको बताउँदै समायोजन नहुनुको कारण आफुलाई थाहा नभएको बताएका हुन् ।
नेप्सेले भने बैंकबाट ढिलो गरी बोनस विबरण आएको र उक्त विबरणमा बोनसको प्रतिशत नखुलाई रकम मात्र उल्लेख गरेर पठाएकाले बिहीबार बिहान समायोजन हुन नसकेको प्रष्टोक्ति दिएको छ । उसका अनुसार बैंकको तर्फबाट प्रष्ट विबरण नदिएका कारण नै यो समस्या आएको हो । आइतबार मात्र प्राइम कमर्शियल बैंकको १७ दशमलव २५ प्रतिशत बोनस समायोजन भएर नयाँ मूल्य निर्धारण हुने नेप्सेले जनाएको हो ।
कुरा जे भए पनि कुनै पनि पक्षले गरेको ढिलासुस्तीको भागिदार सर्वसाधारण लगानीकर्ता किन हुनु पर्ने भन्ने हो । केही समय अघि नेपाल इन्भेष्टमेण्ट बैंकले एस डेभलपमेण्ट बैंकलाई एक्वायर गर्ने सम्झौता गरिसके पछि भोलिपल्ट धमाधम सेयर किनबेच भयो र अन्त्यमा ती सबै कारोबार रद्ध गरियो । यस क्रममा दुख पाउने लगानीकर्ताले नै हो । विभिन्न बहानामा हुने यस्ता त्रुटि सुधार गर्न सबै पक्ष चनाखो नहुने हो भने आगामी दिनमा पनि यस्ता समस्या नआउला भन्न सकिन्न ।