बैंकले लेखेको पत्रमा भनिएको छ बैंकले प्रस्ताव गरेको एफपिओको मूल्य नियामक निकाय नेपाल धितोपत्र बोर्डबाट अनुमोदन हुन बाँकी रहेको छ । चार्टर्डले नेपाल धितोपत्र बोर्ड, स्टक एक्सचेन्जसहित सरोकारवाला निकाय कम्पनी रजिष्ट्रार, सीडीएस एन्ड क्लियरिङ लिमिटेड, नेपाल राष्ट्र बैंकमा यो प्रस्टीकरण पत्र पठाएको हो ।
धेरैले बैंकले प्रस्ताव गरेको प्रिमियम भाउ नै अन्तिम हो भन्ने बुझेकाले थप प्रस्ट पारिएको हो । एफपीओ निष्कासनसम्बन्धी मापदण्डका आधारमा धितोपत्र बोर्डले चार्टर्डको प्रिमियम मूल्य तोक्नेछ ।
बैंकले एक सय रुपैंयाको फ्रेस भ्यालुमा ११९० रुपैंया प्रिमियम थप गरी १२९० रुपैंयाँमा थप नयाँ साधारण सेयर अर्थात एफपिओ निष्काशन गर्ने प्रस्ताव गरेको छ ।बैंकले कुल २५ लाख ५८ हजार एक सय ४० कित्ता एफपीओ उल्लेखित मूल्यमा निष्काशन गर्ने भएको हो ।
बैकले ३ अर्ब ३० करोड रुपैयाँ बराबरको एफपीओ निष्काशन गर्नेछ । जस मध्ये बैंकको चुक्ता पूँजीमा २५ करोड रुपैंया थपिनेछ भने बाँकी तीन अर्ब पाँच करोड रुपैंया जगेडा कोषमा सञ्चित हुनेछ ।
यता एफपिओको निष्कासनको खबर सार्वजनिक भएपछि नेपाल स्टक एक्सचेञ्जमा यो बैंकको सेयरमूल्य निरन्तर बढेको छ । एफपिओबाट संकलन हुने प्रिमियम रकम र चालु आर्थिक बर्षको नाफाबाट अर्कोबर्ष बैंकले शत प्रतिशत बोनस दिनसक्ने आँकलन हुन थालेपछि बैंकको सेयर भाउ निरन्तर बढ्ने क्रममा रहेको छ । सोमबार पनि सेयरबजारमा यसको भाउ उकालो लागेको छ ।
बैंकले एनएमबि क्यापिटल लिमिटेडलाई सेयर निष्कासन तथा बिक्री प्रबन्धकमा नियुक्त गरेको छ ।
दुई अर्ब ८१ करोड रुपैयाँ चुक्तापुँजी भएको बैंकले गत आर्थिक बर्षको नाफाबाट ३३ प्रतिशत बोनस वितरण गरी चुक्ता पूँजी तीन अर्ब ७५ करोड रुपैंया पुर्याएको छ । नयाँ सेयर निष्काशन पश्चात उसको चुक्ता पूँजी चार अर्ब मात्र पुग्नेछ भने जगेडा कोषमा सञ्चित हुने प्रिमियमबाट चालु आर्थिक वर्षमा बोनस बितरणबाट उसले पूँजी आठ अर्ब पुर्याउनु पर्ने हुन्छ ।
