यसदिन उच्च कारोबार गर्ने दश कम्पनीको सूचिमा तीन कम्पनी म्युचुअल फण्डका रहेका छन् । यी तीन कम्पनीको मात्रै एघार करोड बढीका इकाईहरु खरिद बिक्री भएका छन । यसले लगानीकर्ताको आर्कषण म्युचुअल फण्डतर्फ भएको देखिन्छ ।
यसदिन सिद्धार्थ इन्भेष्टमेन्ट ग्रोथ स्किम एकको ४ करोड ९४ लाख, नबिल ब्यालेन्स फन्ड एकको ४ करोड ७९ लाख तथा एनएमबि सुलभ इन्भेष्टमेन्ट फण्ड एकको एक करोड ९३ लाख रुपैयाँ बराबरको इकाइहरु किनबेच भएका छन् ।
सोमबार नेप्से ११.६३ अंकले घटेर १४६६.०९ अंकमा झरेको छ । अघिल्लो कारोबारको तुलनामा कारोबार रकम भने दोब्बर बढी पुगेको छ । यसदिन सेयरबजारमा १२९ कम्पनीको ५८ करोड ८७ लाख रुपैयाँ बराबरको सेयर किनबेच भयो ।जसमा प्रभु बैंकको २० करोड ४२ लाख रुपैयाँ बराबरको संस्थापक सेयरको किनबेच भएको छ । घटेको बजारमा प्रभु बैंकको २० करोड बढीको संस्थापक सेयरको किनबेच भएपछि धेरैदिन पछि कारोबार रकम ५० करोड नाघेको छ ।
यसपछि स्ट्याण्र्डड चार्टड बैंकको सबैभन्दा बढी ५ करोड ७६ लाख बराबरको कारोबार भयो । एफपिओको मूल्य तय गरेपछि यो कम्पनीको कारोबारका साथै सेयरमूल्य समेत बढेको छ । सोमबार चार्टडको सेयरमूल्य दुई प्रतिशत भन्दा धेरैले बढेर प्रतिकिक्ता २२ सय ६० रुपैयाँ पुगेको छ । त्यस्तै सिद्धार्थ इन्भेष्टमेन्ट ग्रोथ स्किम एक र नबिल ब्यालेन्स फन्ड एकको पनि पौने पाँच करोड बराबरको ईकाइ किनबेच भएको छ ।
यसदिन ग्रिन डेभलपमेन्ट बैंकका लगानीकर्ता सबैभन्दा धेरै कमाउनेमा परेका छन् । चार सय प्रतिशत हकप्रदको प्रस्ताव राखेर साधारणसभा बोलाएपछि ग्रिन डेभलपमेन्ट बैंकको सेयरमूल्य झण्डै दश प्रतिशतले उकालो लागेको छ । लुम्बिनी फाइनान्स, सहयोगि विकास, नेरुडे लघुवित्त, स्ट्याण्र्डड चार्टड तथा सगरमाथा फाइनान्स लगायतका कम्पनी धेरै कमाउनेमा परेका छन् ।
यसदिन कर्णाली डेभलपेमन्ट बैंकका लगानीकर्ता सबैभन्दा धेरै गुमाउनेमा परेका छन । यो बैंकको सेयरमूल्य दश प्रतिशतले घटेको छ ।यस्तै खानिखोला हाइड्रो र प्रभु बैंकको सेयरमूल्य पनि दश प्रतिशतकै हाराहारीमा घटेको छ ।
ग्राण्ड बैंकलाई गाभेको प्रभुको आइतबारबाट नेप्सेमा कारोबार खुलेको हो। दुई दिन लगातार यो बैंकको सेयरमूल्य दश प्रतिशतका हाराहारीमा घटेको छ । यस्तै महालक्ष्मी विकास, युनाइटेड इन्स्योरेन्स तथा किसान माइक्रो लगायतका कम्पनी धेरै गुमाउनेमा परेका छन् ।
