विहिबार नेप्से ० दशमलव ३३ अंकले उकालो लागेर १४६२ दशमलव ५५ अंकमा अडिएको छ । झिनो अंकले नेप्से बढेपनि अघिल्लो दिनको भन्दा उकालो लाग्न सकेन । कारोवारमा आएका अधिकांश समुहको परिसुचक सकारात्मक रहेपनि बजार लिडर वाणिज्य बैंक र उत्पादन समूह नकारात्मक रहेपछि बजार स्थिर हुन पुग्यो ।
वाणिज्य बैंक साढे तीन अंक तथा उत्पादन समूह करिब नौ अंकले ओरालो लागेका छन् । अन्य बाँकी समूह भने सामान्य बढेका छन् । सबैभन्दा धेरै बढेको बीमा समूह ५२ अंकले उकालो लागेको छ ।
१३१ कम्पनी कारोवार भएको विहीबारको सेयर बजारमा ११ लाख १४ सय कित्ता सेयर ३३ करोड ९५ लाख रुपैयाँ बराबरमा किनबेच भएको छ । अघिल्लो दिनको तुलनामा कारोबार रकम करिब अढाई करोडले बढी हो । यसदिन युनियन फाइनान्सको २ करोड ६५ लाख रुपैयाँ बराबरको संस्थापक सेयरको किनबेचले पनि कारोबार रकम बढाउन टेवा पुगेको हो ।
यसदिनको कारोबारमा युनियन फाइनान्सकै संस्थापक सेयरको कारोबार सबैभन्दा बढी हो । यसपछि उच्च कारोबार गर्ने प्रभु बैंकको पनि दुई करोड बढीको सेयर किनबेच भएको छ । नेपाल बैंक, एसबिआई,मेगा, सिद्धार्थ बैंक र नेपाल बैंकले पनि करोड बढीको कारोबार गरे ।
विहीबारको बजारमा राष्ट्रिय बीमा कम्पनीका लगानीकर्ताले कमाए । यो कम्पनीको सेयरमूल्य करिब दश प्रतिशतले बढेको छ । कर्णाली डेभलपमेन्ट, ओरेन्टल होटल, एनबि इन्स्योरेन्स,युनाईटेड इन्स्योरेन्स तथा वेष्टर्न डेभलपेमन्ट बैंकका लगानीकर्ता धेरै कमाउनेमा परे ।
अघिल्लो दिन दश प्रतिशतको दरले गुमाएका हिमालयन डिस्टलरीका लगानीकर्ताले विहीबार पनि सबैभन्दा धेरै गुमाएका छन् । यसदिन यो कम्पनीको सेयरमूल्य पाँच प्रतिशत भन्दा धेरैले घटेको छ । यस्तै मिथिला लघुवित्त,युनियन फाइनान्स संस्थापक, ग्रिन डेभलपमेन्ट बैंक तथा सेति फाइनान्स लगायतका कम्पनी धेरै गुमाउनेमा परे ।