बैंकले सर्वसाधारण समूहतर्फको एक लाख तीन हजार एक सय ६७ कित्ता र १० हजार चार सय ९३ कित्ता संस्थापक सेयर बोलकबोलमा बेच्न लागेको हो ।
ईच्छुक लगानीकर्ताले बुधबारसम्म बोलकबोलमा आवेदन गर्न सक्नेछन् । लगानीकर्ताले कम्तिमा एक सय रुपैयाँ अंकित मूल्य तोकी त्यसभन्दा बढी अंकित मूल्य राखेर आवेदन गर्न सक्नेछन् । बैंकको सेयरमा बोलकबोल गर्नेले न्युनतम एक सय कित्तादेखि लिलाममा राखिएको सबै कित्ताको लागि आवेदन गर्न सक्नेछन् ।
बोलकबोल मार्फत सेयर लिलामी गर्न बिक्री प्रबन्धक एनआइबीएल क्यापिटल तथा मुक्तिनाथ विकास बैंक, पृथ्विचोक, पोखराबाट आवेदन फारम लिन र बुझाउन सकिनेछ । विक्री प्रबन्धक एनआइबीएल क्यापिटलले बोलपत्र माघ २१ गते शुक्रबार दिउँसो ३ बजे लाजिम्पाटमा खोल्नेछ ।
सेयर बजार ओरालो लाग्ने क्रममा लगानीकर्ताले चनाखो भएर बोलकबोलमा सहभागि हुनु पर्ने सिद्धार्थ बैंकको सेयर लिलामीले देखाई सकेको छ । मंगलबार छ सय ६० रुपैंयासम्ममा किनबेच भएर बजार बढ्दा मुक्तिनाथको प्रतिकित्ता सेयर छ सय ९९ रुपैंयामा अन्तिम पटक कारोबार भएको थियो । बजार कता जान्छ भन्ने आँकलन गरी सोही अनुसार बोलकबोलमा सहभागि हुने लगानीकर्ताले नोक्सान व्यहोनु नपर्ने देखिन्छ ।
बैंकले चालु आर्थिक बर्षको दोस्रो त्रैमाससम्म २२ करोड नाफा कमाएको छ । चुक्ता पूँजी एक अर्ब ५३ करोड रहेको बैंकले निक्षेप १४ अर्ब तथा कर्जा १३ अर्ब नघाएको छ । बैंकको निस्क्रिय कर्जा अनुपात ०.१८ प्रतिशत रहेको छ । चुक्ता पूँजी दुई अर्ब ५० करोड पुर्याउन उसले ४० प्रतिशत हकप्रद बिक्रीमा ल्याउने प्रकृया अगाडि बढाउँदै छ । साथै बैंकले आफ्नो केन्द्रिय कार्यालय माघ १९ गते देखि पोखराबाट काठमाडौं कमलादीमा सारेको छ ।
