हिमालयन जनरल इन्स्योरेन्सले चालु आर्थिक वर्षको दोस्रो त्रैमासमा चार करोड तीन लाख रुपैंया खुद नाफा कमाएको छ । गत आर्थिक वर्षको यसै अवधिमा तीन करोड ४३ लाख रुपैंया खुद नाफा कमाएको इन्स्योरेन्सको कमाई १७ दशमलव ४६ प्रतिशतले बढेको देखिन्छ तर १६६ प्रतिशत हकप्रद सेयर समायोजनपछि उसको प्रति सेयर आम्दानीमा ठूलो गिरावट आउने हुँदा यसअघि उचालिएर सेयर किन्नेहरु मारमा पर्नसक्छन् ।
उसले हकप्रद बिक्री गरेर जम्मा गर्ने रकम समेत बिमा दावी भुक्तानीमा खर्च हुनसक्ने देखिन्छ । उसको बिमा दावी भुक्तानी यस बर्ष मात्रै ६७ करोड रुपेयाँले बढेको देखिएको छ ।
अहिले २६ करोड ७५ लाखको पूँजीलाई ३८ करोड ५२ लाख पुर्याउँदा नै प्रतिसेयर आम्दानीमा संकुचन आएर २५ रुपैयाँ ६८ पैसाबाट २० रुपैयाँ ९५ पैसामा झरेको छ । यसरी एक पटक बोनसबाट मात्र पूँजी थप्दा प्रतिसेयर आम्दानीमा संकुचन आएको अवस्थाका बिच उसको जगेडा कोषको आकार पनि झण्डै आधाले घटेको छ । समिक्षा अवधिमा कम्पनीको जगेडा कोष १३ करोड ४१ लाख रुपैंयाबाट घटेर सात करोड ४८ लाख रुपैंयामा खुम्चिएको छ ।
समिक्षा अवधिमा खुद बीमाशुल्क रकम ११ करोड ३३ लाखबाट १५ करोड १९ लाख रुपैंया पुर्याएको कम्पनीको पुनर्बीमा कमिशन आय पनि तीन करोड ६२ लाखबाट पाँच करोड १० लाख रुपैंया पुगेको छ । पाँच करोड ८९ लाख रुपैंयाको बीमा दाबी भुक्तानी गरेको कम्पनीले पाँच अर्ब ४४ करोड ४१ लाख रुपैंयाको बीमा दाबी भुक्तानी गर्न बाँकी छ ।
