वार्षिक बिन्दुगत आधारमा पुस मसान्तमा बैंक तथा वित्तीय संस्थाहरूको निक्षेप २०.८ प्रतिशतले बढ्दा निजी क्षेत्रततर्फ लगानीमा रही रहेको कर्जा ३२ प्रतिशतले बढेको छ ।
यता निक्षेप संकलनमा भने गत बर्ष पुसमा ८.६ प्रतिशत रहेकोमा हाल ८.२ प्रतिशतमा घटेको छ । बचतमा समेत एक दशमलव ७० प्रतिशतले घटेर ४२.१ प्रतिशतमा सिमित हुँदा तरलता अभावका कारण मुद्दतीको ब्याज बढाँउदा यसमा भने ३.५० प्रतिशतको वृद्धि भएर ३२.७ प्रतिशतमा निक्षेप बढ्न पुगेको छ ।
उता निजी क्षेत्रतर्फ प्रवाहित कर्जामध्ये वाणिज्य बैंकहरुको १४.८ प्रतिशत र विकास बैंकहरुको ६.२ प्रतिशतले बढ्दा वित्त कम्पनीहरुको ५.२ प्रतिशतले घट्न पुगेको छ ।
बैंक तथा वित्तिय संस्थाले गत आर्थिक बर्षको छ महिनाको अवधिको तुलनामा यस बर्षको सोही समयमा बैंक तथा वित्तीय संस्थाहरूले कुल लगानीमा रहेको कर्जामध्ये सेयर मार्जिन, ओभरड्राफ्ट, घरजग्गा तथा हायर पर्चेज तर्फको कर्जा उल्लेख्य विस्तार भएको प्रतिवेदन सार्वजनिक गरेको छ ।
राष्ट्र बैंकले बैंक तथा वित्तिय संस्थाले अनुत्पादक क्षेत्रमा कर्जा बढाएकाले तरलता संकट आएको बताईरहेको बेला बैकहरुले गत बर्षको अर्धबार्षिक अवधिको तुलनामा अनुत्पादक क्षेत्रमा यो प्रतिशतले बढाएको देखिएको हो ।
जसमा सेयर मार्जीन कर्जामा ४७.८३ प्रतिशत, ओभर डाफ्ट कर्जा ३१.६७ प्रतिशत, घरजग्गा कर्जामा समेत ३०.७३ प्रतिशत र हायर पर्चेज कर्जा ६७.५७ प्रतिशतले बढेको देखिन्छ ।
गत बर्षको पुस मसान्तसम्ममा बैंक तथा वित्तिय संस्थाले कुल सेयर मार्जीन २७ अर्ब ६० करोड कर्जा लगानी गरेकामा यस बर्षको सोहि अवधिमा बढेर ४० अर्ब ८० करोड रुपैँया पुगेको हो । समिक्षा अवधिमा घरजग्गा कर्जा २१९ अर्ब रुपैँयाबाट बढेर २८६.३ अर्ब पुगेको देखिन्छ । जसमा एक करोड सम्मको आवासीय घरकर्जाको अंश १५.१ प्रतिशत रहेको छ ।
त्यस्तै विलासी सामान खरिद गर्न दिईने हायर पर्चेज कर्जा ८५.१ अर्ब रुपैँयाबाट १४२.६ अर्बमा पुगेको छ । यस अवधिमा ओभर डाफ्ट कर्जा ३१.६७ प्रतिशतले वृद्धि भएर ३४१.३ अर्ब रुपैँया पुगेको छ । समीक्षा अवधिमा वाणिज्य बैंकहरूबाट प्रवाहित ट्रष्ट रिसिट (आयात) कर्जा गत बर्ष १३.४ प्रतिशतले घटेकोमा यो बर्ष ६.४ प्रतिशत अर्थात ४ अर्ब ६२ करोड रुपैँयाले बढेको हो ।
