धितोपत्र बोर्डले नेपाल लाइफ इन्स्योरेन्स र फरवार्ड कम्युनिटी माइक्रोफाइनान्सको सेयर बाँडफाँट फागुन १३ भित्र गर्न सम्बन्धित कम्पनीका बिक्री प्रबन्धकलाई निर्देशन दिएको थियो । सिद्धार्थ र नबिलले फागुन १३ सम्म बाँडफाँड गर्न नसक्ने जनाएपछि धितोपत्र बोर्डले अर्को पत्र लेख्दै २२ गतेसम्मको समय दिएपछि सेयर बाँडफाँडमा ढिलाई भएको हो ।
सिद्धार्थ क्यापिटल लिमिटेडका प्रमुख कार्यकारी अधिकृत ध्रुव तिमिल्सिनाले धितोपत्र बोर्डबाट फागुन २२ गतेसम्म एफपीओ बाँडफाँट गरिसक्न अर्को पत्र प्राप्त भएको जानकारी दिए । 'बोर्डले २२ गतेसम्मको समय दिएपनि हामी सकेसम्म २२ गतेभन्दा अगाडि नै बाँडफाँट गर्ने तयारीमा छौ, तिमिल्सिनाले भने ।
यता फरवार्ड कम्युनिटी माइक्रोफाइनान्सको बिक्री प्रबन्धक नबिल इन्भेष्टले पनि २० गते भित्रै बाँडफाँट गर्नेगरी काम गरिरहेको जानकारी दिएको छ ।
नेपाल लाइफले हालैमात्र १४ सय २५ रुपैयाँका दरले ३० लाख ९६ हजार ४२० कित्ता एफपीओ सर्वसाधारणलाई बिक्री गरेको छ । यो एफपीओमा करिब ५२ अर्ब रूपैयाँ आवेदन परेको थियो । फरवार्डले ६ लाख कित्ता साधारणसेयर जारी गरेको थियो ।
