कुमारी बैंकले आगामी चैत छ गतेदेखि ५० प्रतिशत हकप्रद निष्काशन गर्ने भएको छ । बैंकले हकप्रद निष्काशनको आह्वानपत्र प्रकाशित गर्दै हाल कायम चुक्ता पूँजीको ५० प्रतिशतले हुने एक करोड ३४ लाख ९५ हजार ८३२.६६ कित्ता सेयर निष्काशन गर्न लागेको हो । चैत २० गते बैंकले साधारण सभा तथा हकप्रदका लागि सेयरधनी पुस्तिका बन्द गर्दैछ । हकप्रद र बोनस सुरक्षित गर्न चाहनेले आज सेयर खरिद गरिसक्नु पर्नेछ ।

बैंकले फागुन २० गतेदेखि बुक क्लोज गरी चैत नौ गते साधारण सभा बोलाउने निर्णय गरेको छ । गत आर्थिक वर्षको कमाईबाट बैंकले २१ प्रतिशत बोनस पनि प्रस्ताव गरेको छ । प्रस्तावित बोनस तथा हकप्रदका लागि बैंकले एकै पटक सेयरधनी पुस्तिका बन्द गरेको हो । बैंकले उल्लेखित स्थानबाट हकप्रद सेयरमा आवेदन गर्न सक्ने व्यवस्था मिलाएको छ । चैत छ गतेदेखि खुल्ला भएको हकप्रदमा लगानीकर्ताले बैशाख १० गतेसम्ममा आवेदन गरिसक्नु पर्छ ।

हाल बैंकको २ अर्ब ६९ करोड ९१ लाख रुपैयाँ चुक्तापूँजी रहेको छ । पचास प्रतिशत हकप्रद वितरण गरेपछि बैंकको पूँजी चार अर्ब चार करोड रुपैयाँ पुग्नेछ । गत आर्थिक वर्षको कमाईबाट २१ प्रतिशत बोनस सेयर बितरण पश्चात बैंकको चुक्ता पूँजी तीन अर्ब २६ करोड ५९ लाख रुपैंया पुग्ने छ ।

एनसीसी बैंकसँग मर्ज भाँडेर आफै आठ अर्ब चुक्ता पूँजी पुर्याउन कस्सिएको कुमारीले काष्ठमण्डप, महाकाली, काँक्रेबिहार विकास बैंक र पश्चिमाञ्चल फाइनान्सलाई एक्वायर गर्ने सम्झौता गरिसकेको छ । यी ४ वटा संस्थालाई एक्वायर गरेपछि कुमारी बैंकको चुक्ता पुँजी ६ अर्ब रुपैयाँ नाघ्नेछ ।

राष्ट्र बैंकले तोकेको पूँजी पुर्याउन बैंकले अहिलेको बोनस, हकप्रद तथा एक्वायर पुरा गरी कायम हुने चुक्ता पूँजीको २० प्रतिशत हकप्रद निष्काशन गर्ने प्रस्ताव गरेको छ । यो २० प्रतिशत हकप्रद समेत निष्काशन भैसके पछि बैंकको चुक्ता पूँजी आठ अर्ब रुपैंया नजिक हुनेछ ।