राजधानी केन्द्रित सेयर कारोबारलाई मुलुकका अन्य स्थानमा पनि बिस्तार गर्ने लक्ष्य अनुरुप आइतबारदेखि छ वटा सेयर दलालहरुले रिमोट वर्क स्टेसनबाट सेयर कारोबार सुरु गरेका छन् । कारोबार सुरु गरेको पहिलो दिनमा छ स्थानबाट एक करोड २१ लाख ४३ हजार रुपैंयाको सेयर किनेबच भएको नेपाल स्टक एक्सचेञ्जले जनाएको छ ।

नेप्सेका अनुसार आइतबार राजधानी बाहिरबाट सेवा सुरु गरेको कालिका सेक्युरिटिजले नेपालगञ्जमा सबैभन्दा धेरै सेयर किनबेच गराएको छ । त्यसै गरी झपाको बिर्तामोडमा श्रीहरी सेक्युरिटिजले दोस्रो ठुलो रकमको सेयर कारोबार गराएको छ । तेस्रो स्थानमा चिवनको नारायणघाटमा सनी सेक्युरिटिजले धेरै सेयर किनबेच गरेको छ भने चौथो स्थानमा इम्पेरियल सेक्युरिटिजले नेपालगञ्जमा धेरै सेयर कारोबार गरेको छ ।

त्यसै गरी बिराटनगरमा क्रिष्टल सेक्युरिटिज कारोबार रकमका आधारमा पाँचौं स्थानमा रहँदा भिजन सेक्युरिटिज बनेपामा छैठौं स्थानमा रहेको छ । छ सेयर दलालले गरेको कारोबार विबरण यस्तो छ ।

यो तथ्यांकलाई हेर्दा सेयर कारोबारमा नेपालगञ्ज अगाडी रहेको छ । दुई ब्रोकरले गरी नेपालगञ्जमा मात्र आइतबार ३४ वटा कारोबारबाट ६५ लाख २८ हजार रुपैंयाको सेयर किनबेच गरेका छन् । आइतबार छ सेयर दलालले गरेको कुल कारोबारको ५० प्रतिशत बढी रकमको सेयर किनबेच नेपालगञ्जमा भएको हो ।

पछिल्लो साता सेयर बजारमा तिब्र सुधार आईरहेका बेला राजधानी बाहिरबाट भैरहेको सेयर कारोबार स्थल बढ्दा बजारलाई अझै टेवा पुग्ने विश्वास गरिएको छ । यसका साथै अरु सेयर दलाल कम्पनीले पनि प्रस्तावित स्थानमा रिमोट वर्क स्टेशन छिटो भन्दा छिटो सञ्चालनमा ल्याउने तयारीलाई तिब्र बनाएका छन् । सबै दलालहरुले राजधानी बाहिर आफ्नो शाखा बिस्तार गरे पछि सेयर कारोबारको चाप बढ्ने देखिन्छ ।

यस अघि विभिन्न दलाल कम्पनीका नौ वटा रिमोट वर्क स्टेशन सञ्चालनमा रहेकोमा आइतबार देखि यो संख्या १५ पुगेको छ । नौ सेयर दलालहरुले यस अघि पोखरा, विराटनगर, धरान, नारायणघाट र धनगढीबाट सेयर कारोबार गराउँदै आएका थिए । नेपाल स्टक एक्सचेञ्जले गत माघ १७ गते सेयर दलालहरुलाई रिमोट वर्क स्टेशन सञ्चालनको प्रकृया सुरु गर्न निर्देशन दिएको थियो । सोही अनुसार दलाल व्यवशायीहरुले स्टेशन बिस्तारको काम अघि बढाएका छन् ।

यो पनि पढ्नुहोस्,              कुन सेयर दलाल कहाँ जादैछन ?