यसदिन एनबी बैंकको संस्थापक र साधारणगरी ५८ करोड बढीको सेयर किनबेच भयो। बंगलादेश बैंकको ३८ करोड बराबरको संस्थापक तथा २० करोडको साधारण सेयरको कारोबार भयो ।
८० प्रतिशत हकप्रदका लागि बंगलादेश बैंकको विहीबारबाट बुक क्लोज हुने भएपछि उच्च कारोबार भएको हो ।
२३ प्रतिशत हकप्रद जारी गर्ने अनुमति पाएपछि नेपाल बैंकको कारोबार पनि दश करोड नाघेको छ । सानिमा बैंकको पनि दश करोड बराबरकै सेयर किनबेच भयो ।
अघिल्लो दिन खरिदकर्ताको अत्यधिक चापले नियमित कारोबार भन्दा करिब एक घण्टा अगावै बजार बन्द हुँदा बुधबारको बजारमा पनि खरिदकर्ताको ओईरो लागेको हो । जसले गर्दा एकैदिन दुई अर्ब ५६ करोड बढीको सेयर किनबेच भयो ।
सेयर कारोबारमा उछाल आएपनि अघिल्लो दिनको तुलनामा नेप्से भने २२.३३ अंकले ओरालो लागेको छ । उत्पादन बाहेकका सबै समूह नकारात्मक रहेपछि बजार ओरालो लागेको हो । बजार न्यून विन्दुमा रहदा सेयर किनेकाहरु नाफा सुरक्षित गर्नतर्फ लागेको र नयाँ तथा ठुला लगानीकर्ताहरु बजार प्रवेश गरेकाले लगातार दैनिक उच्चदरले कारोबार हुँदै आएको छ ।
यसदिन सिन्धु र कन्काई विकास बैंकका लगानीकर्ता धेरै कमाउनेमा परे । यी दुवै कम्पनीको सेयरमूल्य नौ प्रतिशत बढीले उकालो लागेको छ । एनबी बैंकका संस्थापक सेयरधनीले भने सबैभन्दा धेरै गुमाए ।
