काष्ठमण्डपको सेयर लिलाम गर्न इच्छुक लगानीकर्ताले सेयर बिक्री प्रवन्धक एनसिएम मर्चेन्ट बैंकिङ लिमिटेड, कमलपोखरी काठमाडौंबाट चैत २८ गतेसम्म लिलामी आवेदन गर्न सक्नेछन् । आवेदन गर्दा न्यूनतम १०० रुपैयाँलाई आधार मानेर त्यसभन्दा बढी मूल्यमा न्यूनतम एक सय कित्ता वा १० कित्ताको गुणांकमा सबै सेयरमा आवेदन गर्न सक्नेछन् ।
बोलपत्र चैत ३० गते ३ बजे एनसिएम मर्चेन्ट बैंकिङ्ग लिमिटेड कमलपोखरी काठमाडौंमा खोल्ने बताईएको छ । लिलामीमा सेयर प्राप्त नगर्ने लगानीकर्ताले बैशाख ७ गतेदेखि रकम फिर्ता पाउनेछन् ।
काष्ठमण्डपले कात्तिक २६ देखि मंसिर ३० गतेसम्म २५ प्रतिशत अर्थात १६ लाख ९९ हजार सात सय ४१ कित्ता हकप्रद सेयर बिक्री खुला गरेको थियो । हकप्रदमा नबिकेको सेयर अहिले लिलामी मार्फत बिक्री गर्न लागिएको हो ।
हाल काष्ठमण्डपको ६७ करोड ९८ लाख ९७ हजार रुपैयाँ चुक्ता पूँजी रहेको काष्ठमण्डपले पुससम्म १० करोड १७ लाख २९ हजार रुपैयाँ खुद नाफा कमाएर प्रतिसेयर आम्दानी बार्षिक २९ रुपैयाँ ९२ पैसा कायम गरेको छ ।
बैंकको सेयर धितोपत्र बजारमा असोज १६ गते ५०० रुपैँयामा कारोबार भएको थियो । काष्ठमण्डपसँगै महाकाली विकास बैंक, काँक्रेबिहार विकास बैंक र पश्चिमाञ्चल फाइनान्स कम्पनी कुमारी बैंकसँग १०० : ८५ अनुपातमा स्वापमा गएका हुन् । कुमारी बैंकको नेप्सेमा मंगलबार सेयर प्रतिकित्ता ३७५ रुपैँया हाराहरीमा कारोबार भैरहेको छ ।
