सिटिजन्स बैंकले हकप्रद बिक्रीका लागि सानिमा क्यापिटललाई बिक्री प्रवन्धक तोकेको छ । हकप्रद सेयरमा सानिमा क्यापिटल लिमिटेड नारायणचौर नक्साल, सिटिजन्स बैंकको सम्पूर्ण शाखाहरु तथा बैंकको सहायक कम्पनी सिबिआईएल क्यापिटल लिमिटेड बाटुलेघर डिल्लीबजारबाट समेत आवेदन दिन सकिने छ । बैंकको हकप्रदमा २०७४ बैशाख २७ गते बन्द हुनेछ ।
फागुन २५ गतेसम्म बैंकको सेयर किन्ने लगानीकर्ताले २५ प्रतिशत हकप्रदमा आवेदन गर्न सक्नेछन् । बैंकको असोज १६ गते सम्पन्न दशौं बार्षिक साधारणसभाले सेयरधनीलाई १० बराबर २.५ कित्ता हकप्रद बेच्ने प्रस्ताव पारित गरेको थियो । बैंकले फागुन १२ गते धितोपत्र बोर्डबाट २५ प्रतिशत हकप्रद जारी गर्ने अनुमति पाएको हो ।
हाल बैंकको चुक्ता पूँंजी ५ अर्व ५३ करोड ७३ लाख रुपैयाँ रहेकोमा २५ प्रतिशत हकप्रद शेयरको बाँडफाँड पश्चात बैंकको चुक्ता पूँजी ६ अर्व ९२ करोड १६ लाख रुपैँया पुग्नेछ । चालु आर्थिक बर्षको मुनाफाबाट एक अर्ब बढीको बोनश वितरण गरेर बैंकले ८ अर्ब पूँजी पुर्याउने लक्ष्य लिएको छ । बैंकले गत बर्ष ५५ प्रतिशत हकप्रद बिक्री तथा ७५ करोड बराबरको बोनस सेयर वितरण गरेको थियो ।
चालु आर्थिक बर्षको दास्रो त्रैमाससम्म बैंकले ६३ करोड खुद नाफा गरेर प्रति सेयर आम्दानी २२ रुपैयाँ कायम गरेको छ । बैंकको सेयर मंगलबार धितोपत्रबाजरमा प्रतिकित्ता ४३७ रुपैँयामा कारोबार भएको छ ।
