फस्ट माईक्रो लघुवित्तले १३ करोड २२ लाख ५० हजार रुपैँया मूल्य बराबरको एक सय रुपैँया अंकित दरको १३ लाख २२ हजार पाँच सय कित्ता हकप्रद सेयर निष्काशन गर्न लागेको हो । कम्पनीको सेयर निष्काशन तथा बिक्री प्रबन्धक ग्लोबल आईएमई क्यापिटल रहेको छ ।
माईक्रोफाईनाइन्सको असोज १९ गते सम्पन्न सातौं बार्षिक साधारणसभाले ५० प्रतिशत हकप्रद जारी गर्ने प्रस्ताव पारित गरेको थियो । हकप्रद सेयर निष्काशनका लागि कम्पनीले धितोपत्र बोर्डबाट चैत १७ गते अनुमति पाइसकेको छ ।
गत आर्थिक बर्षको नाफाबाट १५ प्रतिशत बोनश वितरणपछि माईक्रोफाईनाइन्सको चुक्तापूँजी २६ करोड ४५ लाख रुपैयाँ पुगेको छ । हकप्रदपछि चुक्तापूँजी ३९ करोड ६७ लाख रुपैयाँ पुग्नेछ । केन्द्रिय बैंकले तोकेको ६० करोड पूँजी पुर्याउन अब कम्पनीलाई थप २० करोड बढी पूँजी आवश्यक पर्नेछ ।
नेपाल राष्ट्र बैंक, बैंक तथा वित्तीय संस्था नियमन विभागबाट भाद्र ८ मा जारी गरेको परिपत्र अनुसार राष्ट्रिय स्तरको थोक कर्जा प्रदान गर्ने लघुवित्त वित्तीय संस्थाको पूँजी ६० करोड पुर्याउने व्यवस्था गरेअनुसार लघुवित्तले हकप्रदको बाटो समातेको हो । धितोपत्र बजारमा लघुवित्तको सेयर मंगलबार प्रतिकित्ताको मूल्य १४६० रुपैँया हाराहारीमा कारोबार भएको छ ।