कम्पनीले २८ औ बार्षिक साधारणसभाबाट कायम भएको चुक्तापूँजीको शतप्रतिशत हकप्रद जारी गर्ने यस अघिको निर्णयलाई परिमार्जन गरी हकप्रद ७५ प्रतिशतमा झारेको छ भने थप २५ प्रतिशत बोनस सेयरको प्रस्ताव गरेको छ ।
कम्पनीले प्रस्ताव गरेको हकप्रद तथा बोनस बीमा समितिको स्वीकृतिपछि कम्पनीको आगामी साधारणसभाले पारित गरेपछि लगानीकर्तालाई बिक्री तथा वितरण गरिने कम्पनीले जनाएको छ । कम्पनीको यो निर्णयले एकैबर्ष कम्पनीका लगानीकर्ताले दुईपटक बोनस पाउने भएका छन भने हकप्रदको भारीबाट समेत केही आराम मिल्ने देखिएको छ ।
कम्पनीले आर्थिक बर्ष ०७१/०७२ को मुनाफाबाट ३० प्रतिशत बोनस वितरण गरेर चुक्ता पुँजी एक अर्ब ३२ करोड ४८ लाख ६३ हजार रुपैयाँ पुर्याएको छ ।
उसले लगानीकर्तालाई आर्थिकबर्ष ०७२/०७३ को मुनाफाबाट २५ प्रतिशत बोनस प्रस्ताव गरेर हकप्रदको मात्र घटाएको हो । अब कम्पनीले उक्त पूँजीको ७५ प्रतिशत हुन आउने ९९ करोड ३६ लाख बराबरको हकप्रद बिक्री गर्ने छ भने ३३ करोड १२ लाख रुपैयाँ बराबर अर्थात २५ प्रतिशत बोनस वितरण गर्ने भएको छ ।
कम्पनीको ७५ प्रतिशत हकप्रद र बोनसपछि पूँजी दुई अर्ब ६४ करोड नाघ्ने छ ।
नेशनल लाइफ इन्स्योरेन्सले चालु आर्थिक वर्षको दोस्रो त्रैमासमा आठ करोड ५० लाख आठ हजार रुपैयाँ खुद नाफा कमाएको छ । समिक्षा अवधिमा १३ अर्ब नौ करोड बढी रकमको जीवन बीमा कोषलाई बढाएर इन्स्योरेन्सले १५ अर्ब ७८ करोड ८३ लाख २६ हजार रुपैयाँको बनाएको छ । त्यसै गरी महाबिपत्ति कोषमा सात करोड ६० लाख १३ हजार रुपैंया राखेको कम्पनीले दुई अर्ब नौ करोड ४८ लाख ८७ हजार रुपैंया कुल बीमा शुल्क आर्जन गरेको छ ।
