यस अघि फण्डको आकार एक अर्ब रुपैंया रहेकोमा अधिक माग परेका कारण फण्डको आकार २५ प्रतिशतले बढेर एक अर्ब २५ करोड रुपैंयाको भएको छ ।
जसमा लक्ष्मी बैंको १५ प्रतिशत र सर्वसाधारणको ८५ प्रतिशत हिस्सा कायम गर्दा सर्वसाधारणको एक अर्ब छ करोड २५ लाख रुपैंया तथा लक्ष्मी बैंकको १८ करोड ७५ लाख रुपैंया लगानी हुनेछ । लक्ष्मी बैंकले यस अघि नै १५ करोड रुपैंया जम्मा गरिसकेकोमा अब थप तीन करोड ७५ लाख रुपैंया रकम फण्डमा लगानी बढाउनु पर्नेछ ।
फण्डमा एक अर्ब ६६ करोड करोडको आवेदन परेकोमा एक अर्ब छ करोड २५ लाख रुपैंयाभन्दा बाहेकको झण्डै ६० करोड रुपैंया लगानीकर्तालाई नै फिर्ता गरिनेछ ।
लक्ष्मी ईक्विटी फण्डका इकाईहरु बैशाख २२ गतेदेखि २६ गतेसम्म निष्काशन भएका थिए । सर्बसाधारण लगानीकर्ताले प्रति ईकाई १० रुपैयाँ अंकित मूल्यका १०० इकाईदेखि एक करोड ईकाईसम्मका लागि आबेदन गर्न सक्ने व्यवस्था गरिएको थियो ।
लक्ष्मी क्यापिटलले ईकाई बिक्रीबाट प्राप्त हुने अधिकांश रकम सेयर बजारमै परिचालन गर्नेछ । यस्ता कोषहरुको उपस्थितिबाट नेपालको सेयर बजारलाई स्थायित्वमा आड मिलेको छ ।
सेयर बजारमा आफै जोखिम बहन गरेर प्रत्यक्ष लगानी गर्न नचाहने तथा नयाँ तथा साना लगानीकर्ताहरुका लागि सुरक्षित लगानी गर्न यस्ता सामुहिक लगानी कोषहरु उपयुक्त माध्यम हुन् ।
