कम्पनीले केही समय अघि बक्यौता साधारणसभाहरु एकसाथ सम्पन्न गरेर बिगतमा भएका बदमासीको फेहरिस्त प्रस्तुत गरे पनि संस्थागत सुशासन दयनीय नै रहनु दुर्भाग्यपूर्ण मान्नुपर्छ ।
नेशनल हाईड्रो संचालक समितिले प्रबन्ध संचालक रामबहादुर तामाड. र संचालक प्रकाश रजौरेलाई सार्वजनिक सूचना मार्फत स्पष्टिकरण सोधेपछि नेशनल हाईड्रो फेरि गंभीर बिबादमा फसेको हो ।
नेशनल हाईड्रोले प्रबन्ध संचालक रामबहादुर तामाड.को पदावधि सकिएकाले पदीय हैसियत अनुसार काम नगर्न भनेको छ भने रजौरेलाई पत्रमार्फत सोधिएको स्पष्टिकरणको जवाफ नदिएको भन्दै सार्वजनिक सूचना मार्फत जवाफ तीन दिनभित्र दिन निर्देशन दिएको छ । कम्पनीले उनीहरु दुबैलाई आफुसँग रहेको ल्यापटप, लेटरप्याड, छापसहितका कागजातहरु पनि कम्पनीमा बुझबुझारथ गर्न भनेको छ ।
कम्पनीले सार्बजनिक सूचना मार्फत स्पष्टिकरण सोधेको बिषयमा रजौरेसँग मेरोलगानीले बुझ्दा एनबी समूहले फेरि बखेडा झिकेर आफुमाथि गैरकानुनी कृयाकलपा गरेको आरोप लगाए । उनले कम्पनीलाई सुधारको दिशामा लैजान नदिन र बिगतमा गरिएको बदमासी ढाकछोप गर्न अहिले षडयन्त्रपूर्वक तामाड. र आफुमाथि कारबाहीको तयारी गरिएको हो भने ।
एक अर्ब ३८ करोड चुक्ता पूँजी रहेको नेशनल हाईड्रोमा एनबी समूहको १६ लाख कित्ता सेयर अझै बाँकी छ भने निर्मल प्रधानले केही सेयर बेचेका छन् । हाथ्वे समूहले नेशनल हाईड्रोको केही कित्ता सेयर किनेपछि कम्पनी अब सुधारको दिशामा जाने अपेक्षा गरिएको थियो तर नयाँ लफडा सुरु भएपछि सुधार प्रक्रिया पनि अन्योलमा परेको छ ।
सिन्धुपाल्चोकमा सात मेगावाटको आयोजनाबाट बिद्युत उत्पादन गरिरहेको कम्पनीले बर्षौदेखि लगानीकर्तालाई कुनै प्रतिफल दिन सकेको छैन । कम्पनीमा एनबी समूहले बिगतमा गरेको बदमासीका कारण झै ५५ करोड जगेडा घाटा रहेको छ ।
जलबिद्युत क्षेत्रमा अलग्गै नियमनकारी निकाय बनाउने तर्फ सरकार उदासिन रहेकाले त्यसको प्रत्यक्ष मार नेशनल हाईड्रोका लगानीकर्ताले भोग्दै आएका छन् । सेयरधनीबाट संकलन गरिएको र बिद्युत उत्पादनबाट हुने करोडौ आम्दानी संचालक तथा कर्मचारीहरुले आफुखुशी दुरुपयोग गर्ने गरेका छन् ।
सिन्धुपाल्चोकको तल्लो ईन्द्रावति साढे चार मेगावाट आयोजनाको लाईसेन्स फेरि हात पार्ने र भोजपुरमा साढे १२ मेगावाटको ईर्खुवाखोला आयोजना बनाउने भन्ने कुरामा पनि संचालकहरु बीचको बिबाद मिल्न नसक्दा कुनै काम अगाडि बढ्न सकेको छैन ।
.....मेरो लगानी डटकमको सह-प्रकाशन nepaljournal.com हेरेर प्रतिक्रिया तथा सुझाब दिनुहोला।