बैंकको साधारणसभाले गत आर्थिक बर्षको कमाईबाट सेयरधनीलाई चुक्ता पूँजीको ५.१५ प्रतिशत बोनस सेयर वितरण गर्ने प्रस्ताव समेत पारित गरेको छ । त्यस्तै बैंकको संस्थापक साधारण सेयरधनीको अनुपात ५१:४९ कायम गर्ने प्रस्ताव समेत साधारणसभाबाट अनुमोदन भएको छ । बोनस वितरणपछि बैंकको चुक्ता पूँजी २२ करोड दुई लाख ९४ हजार रुपैयाँ पुगेको छ । साधारणसभाबाट अनुमोदन भएको १२० प्रतिशत हकप्रद जारी गरेपछि बैंकको चुक्ता पूँजी ४८ करोड ४६ लाख ४८ हजार रुपैयाँ पुग्नेछ ।
सांग्रिला डेभलपमेन्ट बैंकको जेठ १९ गते सम्पन्न १२ औं साधारणसभाले कसमस डेभलपमेन्ट बैंकलाई मात्र प्राप्ती गर्ने निर्णय गरेपछि बैंक आफैले १२० प्रतिशत हकप्रद जारी चुक्ता पूँजी पुर्याउने निर्णय गरेको नेपाल कम्युनिटी डेभलपमेन्ट बैंकको कम्पनी सचिव भक्त खड्काले मेरोलगानीलाई जानकारी दिए । उनले आफ्नो बैंकलाई प्राप्ती गर्ने प्रस्ताव अस्वीकृत भएको भन्ने जानकारी प्राप्त भएपनि किन नकिन्ने भन्नेबारे कारण आफुलाई थाहा नभएको बताए ।
राष्ट्र बैंकले २०७४ असार मसान्तभित्र एकदेखि तीन जिल्ला कार्यक्षेत्र भएको बैंकको चुक्ता पूँजी ५० करोड रुपैयाँ पुर्याउन गरेको निर्देशन अनुसार १२० प्रतिशत हकप्रद बिक्रीपछि अब बैंकले एक करोड ५३ लाख ५१ हजार रुपैयाँ सहजै थप गर्न सक्नेछ । किनभने यो रकम बैंकको हकप्रद जारीपछि कायम हुने पूँजीको ३.१७ प्रतिशत मात्र बराबरको रकम हो ।
बैंकले चालु आर्थिक वर्षको चैत मसान्तसम्म एक अर्ब ८० करोड निक्षेप संकलन गरी एक अर्ब ५९ करोड कर्जा लगानीबाट तीन करोड ७६ लाख रुपैयाँ संचालन नाफा आर्जन गरेको छ । बैंकको नाफा गत आर्थिक वर्षको तुलनामा ३ सय ७५ प्रतिशतले बृद्धि भएको बैंकको प्रमुख कार्यकारी अधिकृत राजन खनालले बताए ।
यसअघि सांग्रीला डेभलपमेन्ट बैंकले कसमसलाई किन्ने सम्झौतापछि फेरी २०७३ पुस १३ गते अर्को विकास बैंक नेपाल कम्युनिटीलाई किनेर दुबै बैंकको प्राप्तीपछि कायम हुने चुक्ता पूँजीको ८० प्रतिशत हकप्रद बिक्री गरेर दुई अर्ब ५० करोड रुपैयाँ चुक्ता पूँजी पुर्याउने निर्णय गरेको थियो ।
