कृषि विकास बैंकले चैत १७ गतेभन्दा पछाडि सेयर अभौतिकिकरण गरेका लगानीकर्तालाई भौतिक रुपमा नै बोनस सेयर प्रमाणपत्र वितरण गर्ने भएपछि सास्ती थपिएको हो । बैंकले अहिले वितरण गर्न लागेको बोनस सेयर प्रमाणपत्र भौतिक रुपमा वितरण गर्ने तयारी पुरा भएको बैंकले जनाएको छ ।
बैंकले दशौं बार्षिक साधारणसभाका लागि सेयरधनी किताब बन्द भएको मिति २०७३ चैत १७ गते भन्दा पहिले सेयर डिम्याट गराएका लगानीकर्तालाई भने बैंकले उनिहरुकै हितग्राही खातामा बोनस सेयर पठाईसकेको छ । सो समयमा सेयर डिम्याट नगरेका लगानीकर्ताले भने विक्री प्रबन्धक एस क्यापिटल र आफ्नो हितग्राही खाता रहेको स्थानबाट सेयर अभौतिकिकरण गर्न पुन दौडधुप गर्नुपर्ने भएको हो ।
धितोपत्र बोर्डले अभौतिक रुपमा मात्र सेयर कारोबार गर्ने व्यवस्था गरेपछि पछिल्ला दिनमा धेरै कम्पनीहरुले बोनस तथा हकप्रद अभौतिक रुपमा नै हितग्राही खातामा पठाउन थालिसकेका छन् ।
सेयर डिम्याट नगरेका लगानीकार्ताहरुलाई भने बैंकले असार ६ गतेदेखि साउन ४ गतेसम्म चरणबद्ध रुपमा सेयर प्रमाणपत्र वितरण गर्ने कार्यतालिका बनाएको छ । जस अनुसार अनुसार दैनिक आठ हजार जना सेयरधनीहरुलाई भौतिक सेयर प्रमाणपत्र वितरण गर्ने बैंकले जनाएको छ ।
यो तालिकामा सेयर संकलन गर्न नसक्ने सेयरधनीले साउन ९ गतेपश्चात एस क्यापिटलको सेयर काउन्टर, एस डेभलपमेन्ट बैंक नारायणचौर नक्सालमा सम्पर्क गरी प्रमाणपत्र संकलन गर्न सक्ने बैंकले जनाएको छ ।
साथै काठमाडौं बाहिर रहेका सेयरधनीहरुले आफ्नो नजिकको कृषि विकास वा एस डेभलपमेन्ट बैंकको शाखाबाट निवेदन दिएर सेयर प्रमाणपत्र प्राप्त गर्न सकिने बैंकले जनाएको छ ।