राष्ट्र बैंकले २०७४ असार मसान्तभित्र बैंक तथा वित्तिय संस्थाले तोकिएको चुक्ता पूँजी पुर्याउन पछिल्लो दिनमा एकीकृत कारोबार थाल्ने क्रम ह्वात्तै बढेको छ । केही दिनअघि मात्र ओम डेभलपमेन्ट बैंक र मनास्लु विकास बैंक एक आपसमा गाभिएका थिए भने सेञ्चुरी बैंकले अरनिको र इनोभेटिभ डेभलपमेन्ट बैंकलाई प्राप्ती गरि एकीकृत कारोबार सुरु गरिसकेका छन् ।
त्यसभन्दा पहिला प्राईम बैंकले विराटलक्ष्मी र कन्ट्री डेभलपमेन्टलाई प्राप्ती गरेको थियो भने जनता बैंक र त्रिवेणी विकास बैंक, भक्तपुर र सेन्ट्रल फाईनान्स, ग्लोबल आईएमई बैक र प्यासिफिक डेभलपमेन्ट, सनराईज र एनआईडिसि क्यापिटल मार्केट, श्री इन्भेष्टमेन्ट र एभरेष्ट फाईनान्स लगायतले मर्जर तथा एक्वीजिशन प्रकृयामा गएर एकीकृत कारोबार थालिसकेका छन् ।
महालक्ष्मी र यति बैंकले अहि असार १८ गते आईतबारदेखि महालक्ष्मी विकास बैंकको नामबाट एकीकृत कारोबार थाल्ने भएका छन् । दुुई बैंकले एक बराबर एकको अनुपातमा सेयर आदान प्रदान गर्ने सहमति मर्जरमा गएका हुन् ।
मर्जर पछि बैंकको चुक्ता पूँजी दुई अर्ब ६३ करोड, निक्षेप २३ अर्ब ८४ करोड , कर्जा लगानी १९ अर्ब ९७ करोड शाखा संख्या ६५ तथा ग्राहक संख्या ३ लाख ४५ हजार पुग्नेछ ।
केही समय अघि मात्र महालक्ष्मी फाइनान्स, मालिका विकास बैंक र सिद्धार्थ फाइनान्स एक आपसमा मर्ज भई महालक्ष्मी विकास बैंकको जन्म भएको थियो । पूँजी वृद्धिको अवधि सकिनै लाग्दा महालक्ष्मीले तीन वर्ष पहिले मनकामना विकास बैंक, यति फाइनान्स र भ्याली फाइनान्स मर्ज भएर बनेको यति डेभलपमेण्ट बैंकको साथ लिएको हो ।
उता फेवा विकास बैंक र गण्डकी विकास बैंकले असार २१ गते बुधबारदेखि गण्डकी विकास बैंकको नामबाट एकीकृत कारोबार थाल्ने भएका छन् ।
पोखरा क्षेत्रका दुई विकास बैंक गण्डकी र फेवालाई एकीकृत कारोबार थाल्न राष्ट्रबैंकले अन्तिम स्वीकृति प्रदान गरेको हो । मर्जपछि बैंकको चुक्तापुँजी एक अर्ब ८५ करोड पुग्नेछ । बैंकले अपुग पूँजी २५ प्रतिशत हकप्रद र चालु बर्षको बोनसबाट पुरा गर्ने लक्ष्य लिएको छ ।