हिमालयन जनरल इन्योरेन्स कम्पनीको १६६.६७ प्रतिशत हकप्रदलाई समायोजन गर्दा कम्पनीको सेयरमूल्य ६९१ रुपैयाँ निर्धारण गरिएको नेप्सेले जनाएको छ । यसअनुसार कम्पनीको सेयर कारोबार आईतबार ६९१ रुपैयाँबाट सुरु भएकोमा यो समाचार तयार पार्दासम्ममा पाँच प्रतिशतले सेयर मूल्य बढेर कारोबार भईरहेको छ ।
हिमालयनको १८० दिनको सेयर कारोबारबाट औषत आधारमूल्य ८५१ रुपैयाँ निर्धारण हुन आएको छ । कम्पनीको हकप्रद सूरक्षित गर्ने अन्तिम दिन ब्रोकरहरुले मूल्य अभिबृद्धि कर (भ्याट) मा दर्ता हुन र बक्यौता तिर्न कर कार्यालयले ताकेता गरेपछि बिहीबार एक्कासी सेयर बजार बन्द हुँदा कारोबार प्रभावित भएको थियो ।
हिमालयनले असार २८ गतेदेखि एनएमबि क्यापिटल मार्फत ६४ लाख २० हजार कित्ता हकप्रद सेयर बिक्री गर्दैछ । ३८ करोड ५२ लाख रुपैयाँ चुक्ता पूँजी रहेको हिमालयनको हकप्रद बिक्रीपछि एक अर्ब दुई करोड रुपैयाँ चुक्ता पूँजी पुग्नेछ । चालु आवको तेस्रो त्रैमासिक प्रतिवेदन अनुसार कम्पनीले १२ करोड २१ लाख खुद नाफा कमाएर प्रतिसेयर आम्दानी २० रुपैयाँ ९१ पैसा कायम गरेको छ ।
उता रिलायबल माईक्रोफाईनान्सको पनि ५० प्रतिशत हकप्रदलाई समायोजन गर्दा कम्पनीको सेयरमूल्य १८४३ रुपैयाँ कायम भएको नेप्सेले जनाएको छ । माईक्रोफाइनान्सको १८० दिनको सेयर कारोबारबाट औषत आधारमूल्य १०२६ रुपैयाँ निर्धारण हुन आएको छ ।
रिलायबलले असार २५ गतेदेखि सिभिल क्यापिटल मार्केट मार्फत दुई बराबर एक अनुपातमा दुई लाख ८२ हजार पाँच सय कित्ता हकप्रद सेयर बिक्री गर्दैछ । पाँच करोड ६५ लाख रुपैयाँँ चुक्ता पूँजी रहेको रिलायबलले चालु आवको तेस्रो त्रैमासमा कम्पनीले एक करोड एक लाख रुपैयाँ खुद नाफा कमाएर प्रतिसेयर आम्दानी २४ रुपैयाँ २ पैसा कायम गरेको छ ।
