सिभिल बैंकले आफ्नो एक कित्ता सेयर बराबर युनिक फाईनान्सको शुन्य दशमलव ९० कित्ता र हामा मर्चेन्टको शुन्य दशमलव ८९ कित्ता सेयर अनुपातमा प्रदान गरी प्राप्ती गरेको हो ।
बिगतमा आईएलएफसी जस्ता बित्तीय अबस्था खराब रहेका कम्पनीहरुलाई आफुमा मिसाउँदा सिभिलको अबस्था खराब हुन पुगेको थियो । त्यसमा एमाले सांसद ईच्छाराज तामाड.र तत्कालीन प्रमुख कार्यकारी किशोर महर्जनको कुशासनले बैंक धरासायी अबस्थामा पुग्न झन् सहयोग गरेको थियो ।
बैंकका केही ठूला कर्जा बिना धितोका रहेका र त्यस्ता कर्जाहरु असुल नभएमा बैंकले आगामी दिनमा कर्जा नोक्सानी वापतको रकम थप बढाउनुपर्ने हुन्छ । बैंकले तेस्रो त्रैमाससम्म ४७ करोड रुपैयाँ कर्जा नोक्सानी वापत राखेको छ ।
बैंकका खराब कर्जाहरु असुली गर्न कर्मचारीहरुलाई सिमाबद्ध योजनासहित कडा निर्देशन दिईएकोले चौथो त्रैमासमा सुधार हुने अध्यक्ष अम्बिर बोगटीले मेरोलगानीलाई बताए । चौथो त्रैमासको बित्तीय बिबरण सुधारात्मक नै आउने उनको आँकलन छ ।
बैंकका अन्य संचालकहरुले पनि तत्काल ठूलो सुधार हुन नसक्दा थप खराब हुन नदिन भने आफुहरु क्रियाशील रहेको जनाएका छन् ।
बैंकले गत आर्थिक बर्षमा प्रदान गरेको २।८८ प्रतिशत बोनस तथा दुबै फाईनान्स एक्वायर र ४० प्रतिशत हकप्रद बिक्रीपछि बैंकको चुक्ता पूँजी सात अर्ब २५ करोड ९३ लाख रुपैयाँ पुग्नेछ । अब बैंकले आठ अर्ब चुक्ता पूँजी पुर्याउन ७४ करोड छ लाख ८९ हजार रुपैयाँ थप गर्नुपर्ने हुन्छ ।
सिभिलले चालु आर्थिक बर्षको तेस्रो त्रैमाससम्म १५ करोड ४४ लाख रुपैयाँ कमाएर प्रति सेयर आम्दानी चार रुपैयाँ ५२ पैसा कायम गरेको छ । बैंकको पूँजी कोष १७.५४ र प्रतिसेयर नेटवर्थ १२८ हुनु भने राम्रै पक्ष हो ।
