नेपाल बैंकले २३.७४ प्रतिशत हकप्रद बिक्री गरेपछि चुक्ता पूँजी आठ अर्ब नाघेको हो । अहिले उसको चुक्ता पूँजी आठ अर्ब दुई करोड पुगेको छ भने लिलाममार्फत बेचेको एक लाख ८९ हजार कित्ता हकप्रद सेयर सुचिकृत भएपछि आठ अर्ब चार करोड पुग्ने बैंक सम्बद्ध स्रोतले जनाएको छ ।
राष्ट्र बैंकले यही असार मसान्तको बित्तीय बिबरणमा आठ अर्ब चुक्ता पूँजी कायम हुनुपर्ने गरी बैंकहरुलाई पूँजी बृद्धि नगरे कारबाही गर्ने जनाएको छ ।
केही बर्ष अगाडि खराब कर्जाले थलिएर झण्डै बिघटनमा गएको नेपाल बैंकले हालैका बर्षहरुमा आफुलाई तीब्र रुपमा सुधारी नियमनकारी निकायले तोकेको चुक्ता पूँजी समेत कायम गरी ठूलो फड्को मारेको छ । यस बर्षको खुद नाफा समेतको हिसाब गर्दा उसको जगेडा घाटा समाप्त भएर बैंक क्रमशः सबल दिशामा जाने तयारी गर्दैछ । बैंकले पूँजी कोष पर्याप्तता यस आर्थिक बर्षको सुरुमै कायम गरेको थियो ।
नेपाल बैंक ब्यवस्थापनको ध्यान अब सम्पति बिक्री र ब्यापार बढाउनेतिर केन्द्रित भएको छ । चालु आर्थिक बर्षको चौथो त्रैमाससम्ममा बैंकले तीन अर्ब खुद नाफा नघाउने संकेत देखिएको कर्मचारीहरु बताउँछन् ।
बैंक स्रोतका अनुसार उसले अब साना किसान बिकास बैंकको संस्थापक सेयर, नागरिक लगानी कोषको रहेको दुई लाख ६० हजार कित्ता संस्थापक सेयर र डिप्रोक्स लघुवित्तको साधारण सेयर बिक्री गर्ने प्रक्रिया अगाडि बढाएको छ । कम्पनीद्धारा गठित समितिले सेयरको मूल्य निर्धारण गरे लगत्तैै सेयरहरु लिलाममा आउने जनाईएकोे छ ।
बिगतमा उसले नेपाल ईन्स्योरेन्स, नागरिक लगानी कोष र तारा गाउँ रिजेन्सी होटलको संस्थापक सेयर बेचेर ठूलो रकम आम्दानी गरेको थियो ।
धितो लिलाम गरेर डुबेको कर्जा असुली गरी निस्क्रिय कर्जाको अनुपातलाई पनि कम गर्दै गएर बैंकले आफुलाई स्वस्थ बैंकमा रुपान्तरण गरेको छ ।
