सिन्धु विकास बैंकले हाल कायम चुक्ता पूँजीको ८० प्रतिशतले हुने २० लाख ९७ हजार ५४० कित्ता हकप्रद सेयर निष्कासनको अनुमति प्राप्त गरेको हो । बैंकको सेयर निष्काशन तथा विक्री प्रबन्धक एनआइबिएल क्यापिटल रहेको छ ।
यस अघि पनि भारी मात्रामा हकप्रद निष्काशन गरेको बैंकको प्रतिसेयर आम्दानीमा भारी गिरावट आउने देखिन्छ । २६ करोड २१ लाख ९२ हजार रुपैयाँ चुक्ता पूँजी रहेको सिन्धु विकास बैंकको ८० प्रतिशत हकप्रद निष्काशन पश्चात चुक्ता पूँजी ४७ करोड नाघ्नेछ ।
चैतसम्ममा दुई करोड ५५ लाख ५० हजार रुपैयाँ खुद नाफा कमाएर प्रतिसेयर आम्दानी १३ रुपैयाँ रहेको बैंकको हकप्रद पछि आम्दानी कति होला भनेर लगानी गर्नु पहिले सोच्नु पर्ने हुन्छ ।
उता काबेली विकास बैंकले पनि धितोपत्र बोर्डबाट चुक्ता पूँजीको ५० प्रतिशत बराबरको हकप्रद विक्री गर्ने अनुमति पाएको छ । बोर्डले तीन लाख ५० हजार ८८० कित्ता हकप्रद सेयर निष्काशन गर्न अनुमति प्रदान गरेको हो ।
गत आर्थिक वर्षको कमाईबाट २० प्रतिशत बोनस बितरण गर्नु पहिलेको पूँजीको ५० प्रतिशत हकप्रद निष्काशन गर्न लागेको हो । गत आर्थिक वर्षको २० प्रतिशत बोनस तथा हकप्रद निष्काशन पश्चात बैंकको चुक्ता पूँजी जम्मा १२ करोड नजिक पुग्नेछ ।
बैंकले फेरी उक्त पूँजीको ५० प्रतिशत हकप्रद प्रताव गरिसकेको छ । यो हकप्रदको प्रकृया पुरा हुँदा पनि बैंकको चुक्ता पूँजी २२ करोड माथि मात्र हुन्छ । थप २७ करोड पूँजी उसले कसरी जुटाउला ? लगानी गर्नु पहिले यो कुरामा ध्यान पुर्याउन जरुरी ।
अब उसको एक मात्र विकल्प मर्जर वा विलय हो । हकप्रदमा उचालिएर सेयर किन्दा लामो समयका लागि लगानी फस्नेतर्फ सचेत हुनुहोस् ।
