अरुण फाइनान्सले एक बराबर एक अनुपातमा एक सय रुपैयाँ अङ्कित दरको १५ लाख कित्ता हकप्रद सेयर विक्री गर्न लागेको हो । जसका लागि कम्पनीले ग्लोबल आइएमई क्यापिटललाई बिक्री प्रबन्धक नियुक्ति गरेको छ । हकप्रदपछि कम्पनीको चुक्ता पूँजी ३० करोड रुपैयाँ पुग्नेछ ।
अरुणले शतप्रतिशत हकप्रद विक्री गर्न नियामक निकाय नेपाल धितोपत्र बोर्डबाट असार २७ गते स्वीकृति पाइसकेको छ । अब कम्पनीले छिट्टै हकप्रद विक्री गर्ने मिति निर्धारण गर्ने जनाएको छ ।
केही समय अगाडि मात्र समस्याग्रस्त संस्थाको सूचिबाट हटेर नियमित कारोबार थालेको फाईनान्सले राष्ट्र बैंकले दिएको निर्देशन अनुसार हकप्रदबाट चुक्ता पुँजी बढाउन लागेको हो । केन्द्रिय बैंकले तोकेको चुक्ता पूँजी पुर्याउन फाईनान्सलाई अझै ५० करोड रुपैयाँ थप गर्नुपर्ने हुन्छ ।
नियमित कारोबार थालेपछि कम्पनीले तेस्रो त्रैमाससम्ममा १० लाख ७१ हजार रुपैयाँ खुद नाफा कमाएको छ । अझै फाइनान्स कम्पनी १५ करोड २८ लाख जगेडाकोष घाटामा रहेको छ । धितोपत्रको दोस्रो बजारमा सोमबार फाईनान्सको प्रतिकित्ता २१७ रुपैयाँ हाराहारीमा कारोबार भएको छ ।
