एनआईसी एशिया क्यापिटल सञ्चालन गरे यता बैंक र समुहको वित्तीय विबरण निकालेको बैंकले गत आर्थिक वर्षमा एक अर्ब ४६ करोड ९६ लाख ७२ हजार रुपैंया खुद नाफा कमाएको छ । अघिल्लो आर्थिक वर्षमा बैंकले एक अर्ब छ करोड ६९ लाख छ हजार रुपैंया खुद नाफा कमाएको थियो ।
बैंकले समिक्षा अवधिमा चुक्ता पूँजी १५ प्रतिशतले मात्र बढाएकोमा खुद नाफा ३७.७५ प्रतिशतले बढाएको हो । जसका कारण बैंकको अघिल्लो आर्थिक वर्षको प्रतिसेयर आम्दानी पनि उल्लेख्य मात्रामा बढेको छ ।
अघिल्लो आर्थिक वर्षमा १८ रुपैंया ४७ पैसा रहेको प्रतिसेयढर आम्दानी अहिले बढेर २२ रुपैंया पुगेको छ ।
समिक्षा अवधिमा ६९ अर्ब ४८ करोड रुपैंयाको निक्षेप संकलनलाई बढाएर बैंकले ८६ अर्ब ६९ करोड रुपैंया पुर्याएको छ । बैंकले कर्जा परिचालन पनि समिक्षा अवधिमा ५८ अर्ब ४५ करोड रुपैंयाबाट बढाएर ७१ अर्ब ५८ करोड रुपैंया पुर्याएको छ । यसरी कर्जा र निक्षेपको आकार बढाएको बैंकले समिक्षा अवधिमा एक अर्ब ९५ करोड ७७ लाख रुपैंयाको खुद व्याज आम्दानीलाई बढाएर दुई अर्ब ५३ करोड ८२ लाख रुपैंया पुर्याएको छ ।
शुल्क तथा कमिशन शिर्षकमा सामान्य खर्च बढेको बैंकको अन्य सञ्चालन मुनाफा, विदेशी मुद्रैको कारोबारबाट हुने आम्दानी बढेको छ । कर्मचारी खर्च तथा अन्य सञ्चालन खर्च बढेको बैंकले १५ करोड १३ लाख रुपैंया सम्भावित जोखिमका लागि छुट्याएको छ । बैंकले गत आर्थिक वर्षमा ४२ करोड ७९ लाख रुपैंया राइट व्याक गरेको देखाएको छ ।
१३ दशमलव ९५ प्रतिशत पूँजीकोष अनुपात रहेको बैंकले निष्कृय कर्जा अनुपातलाई ०.७६ प्रतिशतबाट ०.३६ प्रतिशतमा झारेको छ ।
केही समय अघि १५ प्रतिशत हकप्रद निष्काशन गरेर सुचिकरण गराई सकेको बैंकको चुक्ता पूँजी छ अर्ब ६९ करोड २५ लाख ९७ हजार रुपैंया रहेको छ । समिक्षा अवधिमा बैंकले आफ्नो जगेडा कोषको आकार एक अर्ब ६० करोड ६५ लाख ९० हजार रुपैंयाबाट बढाएर तीन अर्ब ४९ करोड दुई लाख ३६ हजार रुपैंया पुर्याएको छ । राष्ट्र बैंकले तोकेको पूँजी पुर्याउन अपुग रकम बैंकले यहि जगेडा कोषबाट बोनसका रुपमा विबतरण गर्नेछ ।