यति डेभलपमेन्ट बैंक र महालक्ष्मी विकास बैंक मर्जर प्रकृयामा रहेका कारण दुबै बैंकको सेयर कारोबार २०७३ चैत १ गतेदेखि रोकिएको थियो । बैंकको सेयर कारोबार २२८ रुपैयाँमा अन्तिम पटक कारोबार भएको थियो ।
गत असार १८ गतेदेखि मर्जर पुरा गरी महालक्ष्मी विकास बैंकको नामबाट एकीकृत कारोबार थालेका हुन् । मर्जर प्रकृया सकिएको १५ दिनभित्र सेयर कारोबार खुला गर्नुपर्ने धितोपत्र बोर्डले व्यवस्था गरेपनि बैंकको सेयर कारोबार एक महिनापछि खुला भएको हो ।
मर्जर पछि बनेको महालक्ष्मी विकास बैंक बैंकको चुक्ता पूँजी दुई अर्ब ६३ करोड, निक्षेप २३ अर्ब ८४ करोड, कर्जा लगानी १९ अर्ब ९७ करोड शाखा संख्या ६५ तथा ग्राहक संख्या ३ लाख ४५ हजार पुगेको छ ।
महालक्ष्मी फाइनान्स, मालिका विकास बैंक र सिद्धार्थ फाइनान्स एक आपसमा मर्ज भई बनेकाे महालक्ष्मी विकासले राष्ट्र बैंकले तोकेको दुई अर्ब ५० करोड पूँजी पुर्याउन मनकामना विकास बैंक, यति फाइनान्स र भ्याली फाइनान्स मर्ज भएर बनेको यति डेभलपमेण्ट बैंकको साथ लिएको हो ।
