सेञ्चुरी कमर्शियल बैंक (CCBL) ले गत आर्थिक वर्षमा केही लघुवित्त कम्पनीको भन्दा थोरै कमाई भएको वित्तीय बिवरण निकालेको हो । गत आर्थिक वर्षमा सबैभन्दा थोरै कमाई गर्ने बैंकको पहिलो स्थानमा सिभिल बैंक रहेकोमा सेञ्चुरीले दोस्रो स्थानमा कब्जा जमाएको हो । उसले गत आर्थिक वर्षमा ४४ करोड ७४ लाख ९९ हजार रुपैंया खुद नाफा कमाएको छ ।
गत आर्थिक वर्षको वित्तीय विबरण हेर्दा निर्धन उत्थान लघुवित्तले ५८ करोड रुपैंया खुद नाफा गरेको छ । यस आधारमा सेञ्चुरीको प्रगति सुस्त देखिएको हो । अघिल्ले आर्थिक वर्षमा ४१ करोड ३५ लाख ३४ हजार रुपैंया खुद नाफा गरेको बैंकले साढे तीन करोड हाराहारीमा मात्र कमाई बढाउन सकेको हो ।
साना वित्तीय संस्थालाई धमाधम आफुमा विलय गरेर आठ अर्ब पूँजी पुर्याउने क्रममा रहेको बैंकको जगेडा कोषको आकार भने झण्डै एक अर्ब रुपैंयाले बढेको छ । अघिल्लो आर्थिक वर्षमा जम्मा १९ करोड रुपैंया रहेको जगेडा कोषमा अहिले एक अर्ब १८ करोड ७७ लाख रुपैंया सञ्चित छ ।
प्रतिसेयर आम्दानी आठ रुपैंया २० पैसा हुँदा जगेडामा आएको तिब्र सुधारले प्रतिसेयर नेटवर्थ १२१ रुपैंया ७५ पैसा कायम भएको छ । उसको निष्कृय कर्जा अनुपात भने ०.२२ प्रतिशतबाट बढेर १.१५ प्रतिशत पुगेको छ ।
बैंकले निक्षेप तथा कर्जा परिचालनको आकार भारी मात्रामा बढाएर खुद व्याज आम्दानी पनि सोही अनुपातमा बढाएको छ । बैंकले अघिल्लो आर्थिक वर्षको तुलनामा धेरै रकम प्रोभिजन गर्नु तथा राइट व्याकको आकार भारी मात्रामा घट्नुले खुद नाफा अपेक्षित रुपमा बढ्न नसकेको हो ।
अहिले ४० प्रतिशत हकप्रद निष्काशन गरिरहेको बैंकले १७ करोड हाराहारीको बोनस बितरण गर्दा पनि चुक्ता पूँजी आठ अर्ब माथि हुन्छ ।