कालीका माईक्रोक्रेडिटको पूँजी बढे अनुपातमा नाफा बढ्नपर्नेमा उल्टै घट्नु, अन्य सञ्चालन खर्चमा उच्च वृद्धि र कर्मचारी खर्च बढ्दै जानु नै कम्पनीको प्रगतिमा ब्रेक लगाउने मुख्य आधार बनेको छ ।
लघुवित्तको खुद नाफामा गत आर्थिक बर्ष १५.५७ प्रतिशतले गिरावट आएको छ । अघिल्लो आर्थिक बर्षमा दुई करोड ६४ लाख रुपैयाँ खुद नाफा कमाएको लघुवित्तको गत बर्षमा ४१ करोडले खुद नाफा घटेर दुई करोड २२ लाख रुपैयाँमा सिमित हुन पुगेको छ ।
पाँच करोड २७ लाख रुपैयाँ जगेडाकोषमा सञ्चित राखेको लघुवित्तको प्रतिसेयर नेटवर्थ १६३ रुपैयाँ ९२ पैसा रहेको छ । निष्कृय खराब कर्जा १.५२ प्रतिशतमा घटाएको कम्पनीको पूँजीकोष प्रयाप्तता २०.५४ प्रतिशत र मूल्य आम्दानी अनुपात ६८.३८ गुणा रहेको छ ।
समिक्षा अवधिमा कम्पनीले ३२ करोड १५ लाख रुपैयाँ निक्षेप संकलन तथा ७६ करोड ९० लाख रुपैयाँ कर्जा परिचालनबाट सात करोड १६ लाख रुपैयाँ खुद व्याज आम्दानी गर्न सफल भएको छ । लघुवित्तको सञ्चालन आम्दानी तीन करोड ७७ लाख रुपैयाँबाट घटेर तीन करोड चार लाख रुपैयाँमा झरेको हो । त्यस्तै अन्य सञ्चालन खर्च एक करोड ४० लाख रुपैयाँले बढेपछि कम्पनीको प्रगतिमा ब्रेक लागेको हो ।
कम्पनीले संभावित जोखिम बापत कोषको रकम दोब्बरले बढेर एक करोड एक लाख रुपैयाँ पुगेको छ । अघिल्लो आर्थिक बर्षमा ५७ लाख व्यवस्था गरेको थियो ।कम्पनीले ४५ लाख ४७ हजार रुपैयाँ संभावित जोखिम कोषबाट फिर्ता गरेको छ ।
