आइतबार नेप्से १७.६३ अंकले बढेर १५४७.९४ अंकमा पुगेको छ । यसदिन १५९ कम्पनीको ७७ करोड ८० लाख रुपैयाँ बराबरको कारोबार भयो । कारोबार रकम अघिल्लो दिनको तुलनामा करिब १५ करोड बढी हो । नेपाल लाइफ इन्स्योरेन्सको संस्थापक सेयरको उच्च कारोबार भएपछि कारोबार रकम बढेको हो ।
यसदिन कारोबारमा आएका अधिकांस समूहका सूचक सकारात्मक रहेपछि बजार दोहोरो अंकले बढेको हो । यसदिन होटल वित्त र अन्य बाहेक सबै समूहका सूचक उकालो लागेका छन्। वीमा समूह ४३ अंक तथा वाणिज्य बैंक समूह २५ अंकले बढेको छ । उत्पादन र व्यापार समूहको सूचक समेत दोहोरो अंकले बढेका छन् ।
आइतबारको बजारमा नेपाल लाइफ इन्स्योरेन्सको सबैभन्दा धेरै २१ करोड बढीको कारोबार भयो । नेपाल लाइफको १७ करोड ८५ लाख बराबरको संस्थापक सेयर तथा ३ करोड ८० लाखको साधारण सेयरको किनबेच भएको छ ।
यसदिन विशाल बजार कम्पनीको सेयरमूल्य सबैभन्दा धेरै झण्डै दश प्रतिशतले बढ्यो । विशाल बजार कम्पनीको २० महिनापछि गत विहीबारदेखि सेयरकारोबार पुन खुलेको थियो। प्रोगेशिभ फाइनान्सको सेयरमूल्य पनि दश प्रतिशतकै हाराहारीमा बढेको छ । ग्रिन डेभलपमेन्ट बैंक तथा हाम्रो विकास लगायतको सेयरमूल्य बढेको छ ।
यसदिन मिथिला लघुवित्त विकास बैंक, नेपाल लाइफ इन्स्योरेन्स संस्थापक, अरुण फाइनान्स तथा कालिका माइक्रोक्रेडिट लगायतको सेयरमूल्य घटेको छ ।