आइतबार बजार खुल्नासाथ ओरालो लागेको नेप्से घटेर १२ बजेसम्मको अवधिमा २८ अंकले ओरालो लागेको हाे । यसबीचमा नेप्से १.८४ प्रतिशतले घटेर १५१४.२४ अंकमा झरेको छ ।
कारोबारमा आएका सबै समूहका सूचक घटेपछि बजार ओरालो लागेको हो । यसदिन बीमा र वाणिज्य बैंक समूहमा उच्च गिरावट देखिएको छ । कारोबारमा आएका दुई कम्पनी बाहेक सबैको सेयरमूल्य घटेको छ । एक घण्टाको अवधिमा ९८ कम्पनीको ५ करोड ४२ लाख रुपैयाँ बराबरको मात्र कारोबार भएको छ ।
सामान्यतया लाभांशको सिजनमा सेयर खरिदको चाप पर्ने गर्छ तर विगतको भन्दा ठिक उल्टो यसपालि लाभांश घोषणा र लाभांश पारित गर्न सधारणसभा आह्वान गरिरहँदा बजार भने निरन्तर ओरालो लागेको छ । कतिपय कम्पनीले साधारणसभाबाट लाभांस पारित समेत गरिसकेका छन् ।
बैंक तथा वित्तीय संस्थामा अधिक तरलताको अवस्था, प्रदेशसभा र प्रतिनिधीसभा निर्वाचनको व्यापक तयारीका लागि राजनैतिक वातावरण समेत सुध्रिदै गएको अवस्थामा सेयर बजारमा आएको गिरावटलाई लिएर लगानीकर्ता अलमलमा परेको देखिएको छ ।
निर्वाचनको पूर्वसन्ध्यामा राजनैतिक वृतमा देखिएको धुब्रिकरणलाई कतिपयले बजार अस्थिर देखिएको बताएका छन् । यसलाई नै कतिपयले बजार घटाउने कारण बताउने गरेका छन् । तर स्थानीय निकायको निर्वाचन अगाडि सेयरबजारमा भने उत्साह देखिएको थियो । सेयरबजारमा राजनैतिक प्रभाव पर्ने भएपनि अहिले राजनैतिक गतिविधीले सकारात्मक प्रभाव पर्नेमा नकारात्मक प्रभाव परेकोमा लगानीकर्ता भने चिन्तित देखिएका छन् ।
साथै यतिबेला बैकिङ क्षेत्रमा अधिक तरलता रहेको छ । राष्ट्र बैंकले आज मात्रै ५ अर्बको तरलताको प्रशोचन गर्देछ । राष्ट्र बैंकका अनुसार बैकिङ प्रणालीमा एक खर्ब बराबरको अधिक तरलताको अवस्था रहेको छ । तर बजारमा सेयर खरिद गर्नेहरुको भने कमी देखिएको छ । भर्खरै दशैँ मनाएर फर्किएका लगानीकर्ता अझै पर्ख र हेरको अवस्थामा रहदा पनि बजारमा सेयर खरिदको चाप घटेको हो । सेयरको माग नहुँदा बजार निरन्तर ओरालो लाग्न पुगेको छ ।
अर्कातर्फ यतिबेला थुप्रै कम्पनीहरुको हकप्रद खुलेकोकाले पनि दोस्रो बजारमा किनबेच कम देखिन्छ । यतिबेला केही कम्पनीहरुले सेयर लिलामी खुलेको छ भने सर्पोट माइक्रो फाइनान्सको आईपिओ समेत खुलेको छ । त्यस्तै यसै साता सिद्धार्थ क्यापिटलले नयाँ म्युचुल फण्ड पनि जारी गर्देछ । लगानीकर्तालाई प्राथमिक बजारले तानेकाले पनि दोस्रोबजारमा सेयरको माग कम भएको आँकलन गरिएको छ ।
.................. सिद्धार्थ बैंकले ल्यायो ‘मेरो सेयर खाता’, वार्षिक ६ प्रतिशत ब्याजदर ..................
.................. १२ मेगावाट क्षमताको दोर्दीखोलाको निमार्ण तीन बर्षमा सक्ने लक्ष्य ..................