मंगलबार नेप्से परिसूचक ०.६६ अंकले घटेर १५६७.६४ अंकमा झरेको छ । सूचक एक अंक कमले तल झरेपनि टेलिकमको कारोबार उच्च भएपछि कारोबार रकममा सुधार आएको छ ।
मंगलबार १५९ कम्पनीको झण्डै ४७ करोड बराबरको सेयर किनबेच भएको छ । कारोबार रकम अघिल्लो दिनको तुलनामा करिब ७ करोड बढी हो ।
यसदिन नेपाल टेलिकमको मात्रै ९ करोड १३ लाख बराबरको कारोबार भयो । टेलिकमको सेयरमूल्य समेत ५.४९ प्रतिशतले बढेर प्रतिकित्ता ८६५ रुपैयाँ पुगेको छ । टेलिकमले लाभांस घोषणा गर्ने दिन नजिकदै जादा लगानीकर्ता यसतर्फ आकर्षित हुन थालेका छन् । कम्पनीले बोनस भन्दा पनि नगद लाभांस दिने गरेको छ ।
बजारलाई प्रभाव पार्ने वाणिज्य बैंक लगायतको सूचकहरु बढ्न नसकेको अवस्थामा कतिपयले नेपाल टेलिकमको मूल्य बढाएर बजार बढाउने प्रयास गरिएको समेत विश्लेषण गर्न थालेका छन् । तर कम्पनीले सुधारका कार्यक्रमसँगै रणनीतिक साझेदार भित्र्याउने प्रयासहरु थालेको खबरहरुले पनि लगानीकतालार्ई उत्साहीत बनाएको हुनसक्छ ।
कारोबार रकमका आधारमा दोस्रो र तेस्रो स्थानमा क्रमशः बुटवल पावर कम्पनी र ग्लोबल आइएमई बैंक परेका छन् । ग्लोबल आइएमई बैंकको लाभांस सुरक्षित गर्ने आज अन्तिम दिन परेकाले पनि कारोबार बढेको हो ।
कारोबारमा आएका नौ उपसुचकमा ६ समूह घटेका छन् भने तीन समुह भने बढेका छन् । वाणिज्य बैंक ९.२, व्यापार ३.२९, होटल १४.५७, विकास बैंक ११.६४, जलबिद्युत १९.३ र फाइनान्स १.७८ अंकले घटेका छन्। बीमा २१.९, उत्पादन मुलक ८.९३ र अन्य ४१.९३ अंकले बढेका हुन्।
मंगलबार सबैभन्दा धेरै मल्टिपर्पोज फाइनान्सको सेयरमूल्य करिब १० प्रतिशतले बढेको छ । त्यस्तै प्रोगेशिभ फाइनान्स, युनाईटेड फाइनान्स, खानिखोला हाइड्रो तथा नेपाल टेलिकम लगायतको सेयरमूल्य बढेको छ ।
छिमेक लघुवित्त विकास बैंकका शेयर धनीले सबैभन्दा धेरै चार प्रतिशतले गुमाए। काबेली विकास बैंक, जानकी फाइनान्स तथा सप्तकोशी डेभलपमेन्ट बैंक लगायतको सेयरमूल्य घटेको छ ।
----------------------------------------------------------------------------------------------------------------------
................ सिद्धार्थ बैंकले ल्यायो ‘मेरो सेयर खाता’, वार्षिक ६ प्रतिशत ब्याजदर ..................
.................. १२ मेगावाट क्षमताको दोर्दीखोलाको निमार्ण तीन बर्षमा सक्ने लक्ष्य ..................