कम्पनीको सोमबार बसेको संचालक समितिको बैठकले गत आर्थिक बर्षको वित्तीय बिवरण भने पारित गरेकाे छ । विगतका दुई आर्थिक बर्षहरुमा क्रमश २३ प्रतिशत र २२ प्रतिशतका दरले बोनस बाँडेको कम्पनीले गतबर्षको कमाईबाट बोनस नबाड्ने निर्णय गरेको हो ।
कम्पनीको चुक्ता पूँजी ५३ करोड ८२ लाख र जगेडा कोषमा ३१ करोड ५६ लाख रुपैयाँ छ । कम्पनीले गत आर्थिक बर्षमा २५ करोड ५५ लाख रुपैयाँ नाफा कमाएको थियो ।
राम्रो मुनाफा र जगेडाकोषमा समेत प्रशस्त रकम हुँदा हुँदै कम्पनीले लाभांश नबाड्ने निर्णय गरेकाे छ । केही लगानीकर्ताले कम्पनीले पूँजी योजना बिपरीत लाभांस सार्वजनिक गरेको आरोप समेत लगाएका छन् ।
सगरमाथाले ७३।०७४ को कमाइबाट ७० प्रतिशत अर्थात ३७ करोड ६८ लाख रुपैयाँ बराबरको बोनस वितरण गरेर ९० करोड चुक्तापूँजी पुर्याउने योजना थियो । समितिले तोकेको एक अर्ब रुपैयाँ जुटाउन त्यसपश्चात हकप्रद जारी गर्ने योजना बीमा समिति मार्फत सार्वजनिक गरेको थियो ।
बीमा समितिले उपलब्ध गराएको यहि तथ्यका आधारमा कम्पनीहरुको पूँजी वृद्धि योजनाका खबरहरु सम्प्रेषण भएका थिए । जसमा सगरमाथाले गतबर्षको कमाईबाट ३७ करोड ६८ लाख अर्थात ७० प्रतिशत बोनस बाड्ने स्पष्ट उल्लेख छ ।
बीमा समितिले सार्वजनिक गरेको बीमा कम्पनीहरुको पूँजीवृद्धि योजना
तर एकाएक पूँजी योजना भन्दा फरक तरिकाले लाभांश नबाड्ने घोषणा भएपछि लगानीकर्ता जिल्लिएका छन ।
कम्पनीले भने पूँजी योजना अनुसार नै लाभांश नबाड्ने योजना सार्वजनिक गरेको दाबी गरेको छ । कम्पनीका एक उच्च अधिकारीले आफ्नो नाम उल्लेख नगर्ने शर्तमा वीमा समितिमा बुझाएको पूँजी वृद्धि योजना अनुसार नै यो बर्ष लाभांश नबाड्ने निर्णय भएकाे बताए । बाहिर के के कुरा सार्वजनिक भए, त्यस बारेमा हामी केही भन्न सक्दैनौ, हामीले बुझाएको पूँजी योजनामा ०७४/०७५ मा बोनस बाडेर अपुग पूँजी हकप्रद बाट जुटाउने प्रष्ट छ , उनले भने । हामीले बीमा समितिमा बुझाएको भन्दा फरक योजना बाहिर कसरी आयो, हामीलाई थाहा छैन। ती अधिकारीले भने ।
ती अधिकारीलाई बीमा समितिमा बुझाएको पूँजी योजना मेरो लगानीलाइ उपलब्ध गराउन आग्रह गर्दा दिन नमिल्ने भन्दै तर्किए । इन्स्योरेन्सले बीमा समितिमा उसले बुझाएको पूँजी योजनामा नभएको बिषय बाहिर सार्वजनिक भएको आरोप लगाएको छ ।
तर कम्पनीले अहिलेसम्म आधिकारीक रुपमा पूँजी वृद्धि योजना सार्वजनिक गरेको छैन । माथि उल्लेखित तालिका तथा तल देखाइएको तालिका गत साउनमा बीमा समितिले उपलब्ध गराएको तथ्यांकका आधार तयार पारिएको थियो । यस्तै तथ्य विभिन्न सञ्चार माध्यममा आएका थिए । यसले पूँजी योजनाका सम्बन्धमा कुनै न कुनै गडबडी भएको पुष्टि गर्छ । । जसले हजारौं लगानीकर्ता थाप्लोमा हात राख्न बाध्य भएका छन् ।
राष्ट्र बैंकले बैंक तथा वित्तीय संस्थाहरुलाई अनिवार्य रुपमा आ आफ्नो वेभसाइट मार्फत पूँजी योजना सार्वजनिक गर्न निर्देशन दिएको छ । तर बीमा समितिले यस प्रकारको निर्देशन नदिँदा बीमा कम्पनीहरुका बिषयमा भने लगानीकर्तामा अन्योलता नै देखिदै आएको छ ।
यता बीमा समितिले सम्बन्धित विभागको कर्मचारी विदामा रहेकाले आजै कागजात हेर्न नसकिने मेरो लगानीलाई बतायो । समितिका एक अधिकारीले सगरमाथा इन्स्योरेन्सको पूँजी योजना हेरेर मात्र यो बिषयमा थप प्रष्ट पार्ने मेरो लगानीलाई बताए ।
गत आर्थिक बर्षको मुनाफाबाट नियमानुसार करिब दश करोड रुपैयाँ बीमा कोषमा सरेपछि बाँकी रहेको मुनाफा १६ करोड रुपैयाँ बोनस बाँड्न मिल्ने थियो । तर अर्को आर्थिक बर्षको मुनाफा समेत जोडी एकैचोटी बम्पर बोनस दिई चुक्ता पूँजी एक अर्ब पुर्याउने योजना नियमनकारी निकाय बीमा समितिमा जानकारी गराएर लाभांश नबाड्ने निर्णय गरिएको कम्पनीले जनाएको छ ।
सगरमाथाले पूँजी योजना अनुसार नै काम गरिरहेको बताइरहँदा बीमा समितिले यस अघि सार्वजनिक गरेको पूँजी योजना फरक देखिएको छ । किन यस्ताे भयाे ? यसमा कम्पनी वा समिति कसको लापरवाही हो ? खोजीको बिषय बनेको छ । कम्पनी र नियमन निकायका सूचना प्रष्ट नहुँदा सर्वसाधारण लगानीकर्ता फस्नुपर्ने अवस्था देखिएको छ ।
------------------------------------------------------------------------------------------------------------------------
................ सिद्धार्थ बैंकले ल्यायो ‘मेरो सेयर खाता’, वार्षिक ६ प्रतिशत ब्याजदर ..................
.................. १२ मेगावाट क्षमताको दोर्दीखोलाको निमार्ण तीन बर्षमा सक्ने लक्ष्य ..................