नेपाल धितोपत्र बोर्डले गत असार ११ गते दुई भन्दा बढी खाता संचालन गरेका हितग्राहीको खाता बन्द गराउन सिडिएससिलाई निर्देशन दिएको थियो । सिडिएससिले कात्तिक २६ गते सूचना प्रकाशितगरी ३५ दिनभित्र दुई भन्दा बढी खाता प्रयोग गरिहेका हितग्राहीलाई खाता बन्द गर्न भनेको छ ।
तर लगानी व्यवस्थापनमा सहभागी भएका लगानीकर्ताको हकमा लगानी व्यवस्थापनमा सहभागी हुनका लागि दुई भन्दा बढी डिम्याट खाता खोल्न भने पाउनेछन् । अन्यको ग्राहकले बढीमा दुई डिम्याट खाता खोल्न सक्ने व्यवस्था गरिएको छ ।
दुई भन्दा बढी खाता संचालन गरिरहेका हितग्राहीहरुले आफ्नो सम्पूर्ण धितोपत्रहरु अब उप्रान्त कायम रहने कुनै दुई वटा खातामा हस्तान्तरण गरि अन्य खाता बन्द गराउनु पर्नेछ ।
हालसम्म पनि केहि लगानीकर्ताहरुको दुई भन्दा बढी हितग्राही खाता रहेको भेटिएको भन्दै सम्पूर्ण लगानीकर्ताहरुलाई तोकिएको भन्दा बढी खाता संचालन नर्गन सिडिएससिले आग्रह गरेको छ ।
साथै दुई भन्दा बढी हितग्राही खाता रहेका लगानीकर्ताले एक महिना भित्र सो खाता बन्द गरिसक्नु पर्नेछ । एक महिनाभित्र दुई भन्दा बढी खाता संचालन गर्ने हितग्राहीले खाता बन्द नगराए सम्पूर्ण खाताहरु रोक्का राख्ने चेतावनी समेत दिएको छ ।
धितोपत्र बोर्डले आस्वा प्रणाली र बाँडफाँड प्रणालीको कार्यान्वयनलाई प्रभावकारी बनाउन तथा लगानीकर्ता एवं बजारको दीर्घकालीन हितलाई समेत दृष्टिगत गरी एक ग्राहकले दुई भन्दा बढी डिम्याट खाता खोल्न नपाउने व्यवस्था गरेको हो ।
यसबाट डिम्याट खाता संचालन कार्य थप व्यवस्थित तथा पारदर्शी भई लगानीकर्ताको वास्तविक संख्या समेत यकिन गर्न सहज हुने बोर्डको विश्वास रहेको छ ।