बैंकले प्रस्ताव गरेको १० प्रतिशत बोनस प्रस्ताव पारित गर्नका लागि मंसिर २८ गते साधारण सभा बोलाएको छ । कर प्रायोजनका लागि ०.५३ प्रतिशत नगद लाभांस समेत पारित गराउन बोलाइएको साधारण सभाका लागि बैंकले मंसिर ११ गतेदेखि सेयरधनी दर्ता पुस्तिका बन्द गर्दैछ ।
अघिल्लो आर्थिक वर्षको बोनस हातमा नपरेका लगानीकर्ता भने बैंकको निर्णयबाट नचाहँदा नचाहँदै पनि १० प्रतिशत बोनस स्वीकार गर्नु पर्ने बाध्यात्मक अवस्थामा पुगेका छन् । शतप्रतिशत हकप्रद सूचीकृत भए पनि बोनस सूचीकृत नहुँदा लामो समयदेखि लक्ष्मी बैंकका सेयरधनीको लगानी बन्धक बनिरहेको छ । त्यसमा पनि अब जबरजस्ती बोनस सेयरको भारी बोक्नु पर्ने बाध्यता उनीहरुमा आई लागेको हो ।
मेरोलगानीसँग कुरा गर्दै बैंकका प्रमुख कार्यकारी अधिकृत सुदेश खालिङले केही दिनमा अघिल्लो आर्थिक वर्षको बोनस सूचीकृत हुने बताए । प्रकृयागत कारणहरुले केही ढिला भएको भन्दै उनले सोमबारसम्ममा सेयर सूचीकृत हुने बताए ।
बैंकले सोमबार नै सेयरधनी पुस्तिका बन्द गर्ने भएकाले कुनै पनि हालतमा अघिल्लो बोनस खाएकाहरुले अहिलेको पनि बोनस खानै पर्ने अवस्था उत्पन्न भएको हो । किनकी आगामी सोमबारसम्ममा सेयर किन्नेहरुले मात्र प्रस्तावित १० प्रतिशत बोनस पाउँछन् । सो दिनसम्म अघिल्लो वर्षको बोनस बिक्री गर्न नपाउने हुँदा बाध्यात्मक अवस्थामा १० प्रतिशत बोनस ग्रहण गर्नुपर्ने देखिएकाे हाे।
