७५ मेगावाट क्षमताको त्रिशुली–गल्छी जलविद्युत आयोजनाको क्षमता घटेपछि मुल प्रबर्द्धक अपि पावर कम्पनीको हकप्रदमा अन्यौलता थपिएको हो । गल्छीको प्रबर्द्धक सिद्धकाली पावर लिमिटेडले श्रोत जुटाउन नसक्ने भएपछि ७५ मेगावाटको आयोजनालाई २६ मेगावाटमा सीमित गर्ने भएको हो । उसले विद्युत विकास विभागमा सुरुङ्ग निर्माण गर्दा लागत बढ्ने भन्दै सुरुङ्ग बाहेकको आयोजना निर्माण गर्ने योजना विभागमा बुझाएको छ । यस सम्बन्धमा आइतबार विभागमा कम्पनीले प्रस्तुती दिएको थियो । आयोजनाको क्षमता घटाउने योजनासँगै अपीको हकप्रदको औचित्य र हकप्रद निष्काशन गर्नुपर्ने कारणमा प्रश्न चिन्ह खडा भएको हो ।
एकाएक आयोजनाको क्षमता ४९ मेगावाटले घटाउने योजना विभागमा पुगेपछि विभागले त्यसको कारण माग गरेको थियो । सिद्धकालीले ८ किलोमिटर लामो र ८.१ मिटर गोलाईको सुरुङ्ग निर्माण गर्दा जोखिम बढ्ने भएकाले जोखिम वहन नगर्ने कारण विभागलाई दिएको छ । उसले सुरुङ्ग निर्माणका लागि ठुलो लगानी आवश्यक पर्ने र त्यो सम्भव नभएकाले आयोजनाको क्षमता घटाइएको जानकारी विभागलाई गराएको थियो ।
...[बिजुली खेलाडी गुरु न्यौपानेलाई बैंक तथा लगानीकर्ताले नपत्याए पछि त्रिशुली गल्छी अन्यौलमा]...
यस अघि नै सिद्धकालीको नाममा त्रिशुली गल्छी निर्माण गर्न भन्दै गुरुप्रसाद न्यौपापनेले अर्बाै रुपैयाँ उठाईसकसेका छन् । केही समय अघि अरुण काबेलीको साधारण सेयर निष्काशन गर्ने क्रममा सिद्धकालीको सेयरमा लगानी गर्न आह्वान गर्दै पर्चा तथा फारम बाँडेर पनि रकम उठाइएको थियो । यस सम्बन्धमा धितोपत्र बोर्डमा उजुरी परेपछि बोर्डले सूचना मार्फत सेयरका नाममा रकम संकलन नगर्न सचेत गराएको थियो । यसरी कम्पनीले रकम उठाएको सम्बन्धमा मेरोलगानीले खबर सम्प्रेषण गरेको थियो ।
त्रिशुली गल्छीमा ८० प्रतिशत प्रतिशत स्वामित्व अपी पावरको छ । त्रिशुली गल्छी आयोजना बनाउनका लागि भन्दै अपीले २ सय प्रतिशत हकप्रद सेयर निष्कासनको प्रचार गरेको २ वर्ष पुग्न लागेको छ । पछिल्लो पटक मात्र अपीले गत असार ३० गते त्रिशुली–गल्छीका लागि भनेर १ बराबर २ अनुपातमा २ अर्ब १० करोड रुपैयाँको हकप्रद सेयर निष्कासन गर्न धितोपत्र बोर्डमा प्रस्ताव पुर्याएको छ । त्यस पहिले २ अर्ब रुपैयाँको हकप्रद प्रस्ताव बोर्डमा दर्ता गरेको थियो । नियमक नभएको कारण देखाउँदै धितोपत्र बोर्डले बैंक वित्तीय संस्था तथा बीमा बाहेकका कम्पनीलाई यस्तो सेयर निष्काशनमा कडाई गरेको थियो । अपीले अझैसम्म बोर्डबाट हकप्रदको अनुमति पाएको छैन ।
...[अरुण भ्यालीको जलबिद्युत कम्पनीमा पारिवारिक ठेक्का, दुई अर्ब बढीको भ्रष्टाचार]...
आयोजनाबाट बैंक तथा वित्तीय संस्था पछि हटेपछि आयोजनाको क्षमता घटाएको हो । डलर अर्बपति विनोदकुमार चौधरीले आयोजनामा लगानी गर्ने भनेकोमा उनी पनि पछि हटेपछि आयोजना अन्यौलमा परेको छ । कम्पनीका अध्यक्ष न्यौपाने अहिले लगानीकर्ता खोज्दै हिडेको अवस्थामा अपीको हकप्रदको सार्थकता र कारण बारे अर्को अध्याय सुरु हुने देखिएको हो ।
यस अघि प्रस्ताव गरिएको आयोजनाको क्षमतामा भारी कटौती गर्ने भएपछि हकप्रद निष्काशनको औचित्यका सम्बन्धमा खोजी हुने देखिएको छ । आयोजनामा हुने लगानीको अनुपातमा अब अपीको हकप्रद समेत प्रभावित हुने निश्चित छ । लगानीको अनुपातका आधारमा अपीले उक्त हकप्रद निष्काशन गर्नु नपर्ने वा त्यासको आकार पनि कटौती गर्नु पर्ने देखिएको हो । ७५ मेगावाटको त्रिशुली गल्छी निर्माण गर्नका लागि अपीको हकप्रद निष्काशन गर्न लागिएको यस अघि नै कम्पनीले बताउँदै आएको छ । अब आयोजनाको क्षमता घटेपछि हकप्रदको अनुपात नघटेको खण्डमा गतिलो चलखेलको गन्ध सार्वजनिक हुने निश्चित छ ।