राष्ट्र बैंकको नीतिगत व्यवस्था अनुसार चुक्ता पुँजी र पुँजी कोष कायम गरेको, संस्थामा नयाँ लगानीकर्ताहरु प्रवेश गरेर संस्थालाई सुचारु गर्ने प्रतिबद्धता जाहेर गरेर सुधारोन्मुख अवस्थामा रहेको भन्दै शर्तसहित समस्याग्रस्तबाट फुकुवा गरिएको राष्ट्र बैंकले जनाएको छ ।
राष्ट्र बैंकको निर्देशन अनुसार अब यी दुई संस्थाले ०७६ मंसिरसम्ममा राष्ट्र बैंकले तोकको चुक्तापूँजी पुर्याउनु पर्नेछ । राष्ट्र बैंकले गरेको व्यवस्था अनुसार राष्ट्रिय स्तरको फाइनान्स कम्पनीले ८० करोड रुपैयाँ न्युनतम चुक्ता पुँजी पुर्याउनुपर्ने हुन्छ ।
केन्द्रीय बैंकले कुवेर मर्चेन्ट फाइनान्सलाई २०६८ पुस २३ गते र ललितपुर फाइनान्सलाई २०७१ चैत १६ गते समस्याग्रस्त घोषणा गरेको थियो ।
कुबेर मर्चेन्ट फाइनान्सले समस्याग्रस्तबाट उम्कन ६० प्रतिशत सेयर हिस्सा दिएर नयाँ लगानीकर्ता भित्र्याएको थियो । कम्पनीमा सिटी एक्सप्रेस निकट केही व्यवसायी, गैर आवासीय नेपाली तथा वैदेशिक रोजगार व्यवसायीको लगानी रहनेछ । साथै कम्पनीले नाम परिर्वतन गरेर सिटी एक्सप्रेस इन्टरनेशनल फाइनान्स लिमिटेड राख्ने निर्णय समेत गरेको छ ।
राष्ट्र बैंकको निर्देशन अनुसार दुवै कम्पनीले तोकेको चुक्तापुँजी पुर्याउन पुँजी बृद्धि योजना ३५ दिन भित्र राष्ट्र बैंकमा पेश गर्नुपर्ने छ । खराब कर्जा घटाउँदै लगेर तोकिएको सिमा भित्र राख्नुपर्नेछ । संस्थागत सुशासन, आन्तरिक नियन्त्रण प्रणाली र जोखिम व्यवस्थापन पनि चुस्त राख्नुपर्ने छ ।
त्यस्तै हाल तोकिएको चुक्ता पुँजी नपुगेको अवस्थामा एकल ग्राहक कर्जा सिमा कोर क्यापिटललको १० प्रतिशत कायम गर्ने तथा तोकिएको चुक्ता पुँजी पुरा भएको अवस्थामा हाल विद्यमान अवस्था अनुरुप एकल ग्राहक कर्जा सिमा कायम हुनुपर्ने राष्ट्र बैंक अन्र्तगत समस्याग्रस्त संस्था रिजोलुसन महाशाखाले जनाएको छ ।
