आप्रवासन दिवसको अवसरमा पिपुल फोरमले राजधानिमा आयोजना गरेको सुरक्षित वैदेशिक रोजगारी विषयक अन्तरक्रियामा सहभागी वक्ताले आप्रवासी कामदारको सुरक्षित गन्तब्य प्रवर्द्र्धनका लागि सरोकारवाला निकायको ध्यानाकर्षण गराए ।
फोरमका सल्लाहकार एवं अधिवक्ता सोम लुईंटेलले वैदेशिक रोजगारीलाई सुरक्षित तुल्याउन नीतिगत सुधारदेखि चेतना अभिवृद्धिका अभियानलाई प्रभावकारी बनाइनुपर्ने बताएका छन् ।
सरकारले वैदेशिक रोजगार ऐन संशोधनको तयारी गरेको र अहिले श्रम मन्त्रालयबाट प्राविधिक रायको लागि कानून मन्त्रालयमा पुगेको जानकारी दिँदै उनले यसले वैदेशिक रोजगारीलाई थप व्यवस्थित र मर्यादित बनाउन सहयोग पुग्ने विश्वास व्यक्त गरे ।
अधिवक्ता नरेन्द्र खनालले वैदेशिक रोजगारीका लागि जाने कामदारलाई कसरी सुरक्षित बनाउने भन्नेबारे ग्रामीण तहसम्म सचेतनात्मक कार्यक्रम लैजानुपर्ने खाँचो रहेकाे औँल्याएका थिए ।
पत्रकार सुनिल न्यौपानेले ‘सुरक्षित वैदेशिक रोजगारीका लागि सञ्चारकर्मीको भूमिका’ विषयक कार्यपत्र प्रस्तुत गर्दै वैदेशिक रोजगारीका बिकृतजन्य विषय मात्र नभई राज्य र सरोकारभएका निकायको ध्यान खिच्ने गरी कामदारको संवेदनशीलतालाई ख्यालमा राखेर समाचार सम्प्रेषण हुनुपर्ने बताए ।
