नेप्सेले सेन्ट्रलको ५० प्रतिशत हकप्रदलाई समायोजन गरि प्रतिकित्ता सेयरमूल्य १४८ रुपैयाँ निर्धारण गरेको छ । यसअनुसार फाइनान्सको सेयर कारोबार मंगलबार खुलेको छ । कम्पनीको १८० दिनको सेयर कारोबारका आधारमा औसत आधार मूल्य भने १७१ रुपैयाँँ कायम भएको छ ।
सेन्ट्रलले २६ लाख ३ हजार ३१४ दशमलव ७५ कित्ता हकप्रदमा एनआइबिएल क्यापिटल मार्केट मार्फत निष्काशन गर्न लागेको छ । हकप्रद जारी हुने भने तोकिएको छैन । चालु आवको प्रथम त्रैमासमा फाइनान्स कम्पनीले २१ लाख ४० हजार रुपैयाँ खुद नाफा कमाएको छ ।
उता मितेरी डेभलपमेन्ट बैंकको ३१.४८ प्रतिशत बोनसपछि मंगलबार नै मूल्य समायोजन भएको छ । नेप्सेले बैंकको बोनसपछि समायोजित सेयरमूल्य प्रतिकित्ता ३७३ रुपैयाँ निर्धारण गरेको छ । यसअनुसार बैंकको सेयर कारोबार खुलेको छ ।
बैंकको १८० दिनको सेयर कारोबारका आधारमा औसत आधार मूल्य भने ५२७ रुपैयाँँ कायम भएको नेप्सेले जनाएको छ । बैंकले गत आर्थिक बर्षको नाफाबाट बोनस वितरण गर्न मंगलबार बुकक्लोज गरेको हो । यसअनुसार पुस ३ गतेसम्म सेयरधनी बनेका सेयरधनीले बोनस प्राप्त गर्नेछन् । मितेरीले पुस २२ गते साधारण सभा आह्वान गरेको छ ।
३८ करोड दुई लाख ९३ हजार रुपैयाँ चुक्ता पूँजी रहेको मितेरीले चालु आवको प्रथम त्रैमासमा दुई करोड ३३ लाख रुपैयाँ खुद नाफा कमाएर प्रतिसेयर आम्दानी २४ रुपैयाँ ५१ पैसा कायम गरेको छ ।
