सोमबार नेप्से १२ अंकले बढेर १४ सय ४३.८० अंकको बिन्दूमा पुगेर बन्द भएको छ । यसदिन १५७ कम्पनीको ४६ करोड ४६ लाख रुपैयाँको शेयर किनबेच भएको हो । कारोबार रकम अघिल्लो कारोबारको तुलनामा १० करोड बढी हो । आइतबार सेयरबजारमा ३६ करोड रुपैयाँ बराबरको शेयर कारोबार भएको थियो ।
यसदिन नेपाल लाइफ इन्स्योरेन्सको सबैभन्दा बढी ८ करोड २६ लाख रुपैयाँ बराबरको सेयर किनबेच भयो । आइतबार पनि नेपाल लाइफको पाँँच करोड बढीको कारोबार भएको थियो । सेयरबजारले सुधारको बाटो समात्दै गर्दा बजारमा तुलनात्मक रुपमा अन्य कम्पनी भन्दा बलियो मानिएको नेपाल लाइफप्रति लगानीकर्ता तानिएका छन् । सर्वसधारण लगानीकर्ता मात्र होईन म्युचल फण्डहरुको रोजाईमा समेत नेपाल लाइफ पर्दा उच्च कारोबार भएको एक लगानीकर्ताले बताए ।
नेपाल लाइफले गतबर्षको मुनाफाबाट लाभांस घोषणा गर्न बाँकी छ । गतबर्ष एफपीओ बिक्री गरेर जगेडाकोष बलियो बनाएको कम्पनीले आर्कषक बोनस दिने आँकलन गर्दे कम्पनीको सेयरमा लगानीकर्ताको आर्कषण देखिएको अर्का एक लगानीकर्ताले बताए । यता कम्पनीले भने लाभांसका बिषयमा कुनै निर्णय भइनसकेको जनाएको छ । तीन अर्ब ९ करोड चुक्तापूँजी रहेको कम्पनीको जगेडा कोषमा ४ अर्ब ८६ करोड रुपैयाँ छ ।
१२ अंकले नेप्से बढ्दा समग्र बजार पूँजीकरण १४ अर्बले बढेर १६ खर्ब ८६ अर्ब कायम भएको छ ।
यसदिन होटल समूहका बाहेक सबै समूहका सूचक उकालो लागेका छन् । सबैभन्दा बढी बीमा समूहको सूचक १२२ अंकले बढेको छ । होटल समूहको सूचक १७ अंकले ओरालो लागेको छ ।
मल्टीपरपोज फाइनान्सको सेयरमूल्य सबैभन्दा धेरै बढेको छ । फाइनान्सको सेयरमूल्य नौ प्रतिशत बढीले उकालो लागेको छ । एशियन लाइफ इन्स्योरेन्स, सहयोगी विकास बैंक, सेन्ट्रल फाइनान्स, नेपाल हाइड्रो लगायतको सेयरमूल्य बढेको छ । यसदिन एनआइबिल प्रगति फण्ड, फस्र्ट माइक्रोफाइनान्सका संसथ्पाक सेयरधनीले सबैभन्दा धेरै ५ प्रतिशतका बढीले गुमाएका छन् ।
