नेपाल स्टक एक्सचेन्जमा यो साता ३ अर्ब ३७ करोड ३३ लाख ८० हजार ९ सय ९० रुपैयाँबराबरको ३ करोड ३७ लाख ३३ हजार ८ सय ९ दशमलव ९ कित्ता सेयर सूचीकृत भएका छन् । यो साता पाँच कम्पनीको हकप्रद र बोनस गरेर उक्त परिमाणको शेयर सूचिकृत भएको हो ।
नेप्सेमा एक्सेल डेभलपमेन्ट बैङ्कको हकप्रद सेयर र ङादी गु्रप पावर, सानिमा बैङ्क, नबिल बैङ्क तथा टुरिज्म डेभलपमेन्ट बैङ्कको बोनस सेयर सूचीकृत भएका हुन् । नेप्सेमा सूचीकरण भएको ७ दिनमा ती सेयर दोस्रो बजारमा खरिद बिक्रीका लागि योग्य हुन्छन् ।
सेयर आपूर्ति बढ्ने क्रम जारी रहदा साताको सेयरबजारमा सामान्य सुधार देखिएको छ भने कारोबारमा गिरावट आएको छ । साताभर सेयरबजार परिसूचक नेप्से पहिलो दिनको तुलनामा ८.४९ अङ्कले बढेर अन्तिम दिन १४४०.२९ अङ्कमा पुगेको छ । ‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पनि पहिलो दिनको तुलनामा २.२९ अङ्कले बढेर ३०३.६८ अङ्कमा पुगेको छ ।
नेप्सेका अनुसार यो साता १ सय ७४ कम्पनीहरुको कारोबार भएको छ । साताभर १७ हजार ३ सय ९३ कारोबारबाट ४१ लाख ५ हजार २ सय १० कित्ता सेयरहरु खरिद बिक्री भई १ अर्ब ७१ करोड १२ लाख ८४ हजार रुपैयाँबराबरको कारोबार भएको छ । कारोबार रकम गत साताको भन्दा ३६.७९ प्रतिशतले कम हो । गत साता २७ हजार ५ सय ८३ कारोबारबाट ६४ लाख ७९ हजार ८ सय ९० कित्ता सेयर खरिद बिक्री भई २ अर्ब ७० करोड ७१ लाख ३७ हजार रुपैयाँबराबरको कारोबार भएको थियो । नेप्सेमा गत साता १ सय ७९ कम्पनीको कारोबार भएको थियो ।
यस साता कारोबार रकम (२३ करोड ७६ लाख ५० हजार रुपैयाँ) को आधारमा नेपाल लाइफ इन्स्योरेन्स कम्पनी लिमिटेड अग्रस्थानमा रहेको छ । त्यसैगरी कारोबार भएको सेयर संख्या (एक लाख ९९ हजार कित्ता) को आधारमा नेपाल लाइफ इन्स्योरेन्स कम्पनी लिमिटेड अग्रस्थानमा रहेको छ । त्यसैगरी कारोबार संख्या (१४७५ वटा) को आधारमा पनि नेपाल लाइफ इन्स्योरेन्स कम्पनी लिमिटेड अग्रस्थानमा रहेको छ ।
यस साता नेपाल स्टक एक्सचेन्जको कारोबार कक्ष नियमित कारोबारका लागि चार दिन खुला रह्यो । यस साता पनि ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन ।