दोस्रो त्रैमासको कर असुली पश्चात बैंक तथा वित्तीय संस्थाहरुको कर्जा पुँजी निक्षेप अनुपात सिसिडि रेशियो राष्ट्र बैंकले तोकेको सिमा नाघेपछि बैंकको ब्याजदर बढ्ने संकेत देखिदा यसको प्रभाव सेयरबजारमा परेको छ ।
सरकारले पुष महिनासम्ममा ३ खर्ब ३६ अर्ब राजस्व संकलन गरेको छ । पुष मसान्तमा सरकारी ढुकुटीमा ठूलो रकम गएपछि बैंक तथा वित्तीय संस्थाहरु कर्जा विस्तार गर्न नसक्ने अवस्थामा पुगेका छन् । अघिकांस बैंकहरुको सिसिडि अनुपात ८० प्रतिशतको हाराहारीमा पुगिसकेको छ । जसले गर्दा बैंकहरु थप कर्जा विस्तार गर्ने अवस्थामा देखिदैनन् । बैंकहरुले निक्षेप नबढाई कर्जा दिन नसक्ने अवस्था पुग्दा ब्याजदर बढ्ने संकेतले सेयर बजार ओरालो लागेको छ ।
लगानीयोग्य रकमको अभावमा बैंकरुबिच निक्षेप तान्न पुन ब्याजदर बढाउने प्रतिस्पर्धा चल्न सक्न्ने आँकलन लगानीकर्ताको छ । जसले गर्दा बैंकहरुलाई कर्जाको ब्याजदर बढाउन समेत दबाब पर्नेछ । सेयर कर्जा लगायतको ब्याजदर बढ्ने सक्ने अनुमानमा पनि लगानीकर्ता बजारप्रति उत्साहीत हुन सकेको छैनन् ।
अर्कातर्फ सूचिकृत कम्पनीहरुले चालु आर्थिक बर्षको दोस्रो त्रैमासको वित्तीय विवरण प्रकाशित गर्ने क्रम सुरु भएको छ । कम्पनीहरुले प्रकाशित गर्ने प्रगति विवरणको पर्खाइमा पनि लगानीकर्ता रहदा कारोबारमा कमी आएको छ । आजै मात्र दुई वटा सामुहिक लगानीकोषको दुई अर्ब बराबरको इकाईको बिक्री खुलेको छ ।प्राथमिक निष्कासनले समेत दोस्रो बजारका लगानीकर्तालाई आर्कषीत गरेको अनुमान गरिएको छ । जसले गर्दा दोस्रो बजारको कारोबारमा सुस्तता आएको हो ।
मंगलबार नेप्से १७.३९ अंकले घटेर १४१३.७१ अंकमा झरेको छ। १५४ कम्पनीका ८लाख ११ हजार कित्ता शेयर ३६ करोड २२ लाख रुपैयाँमा कारोबार भएको छ । कारोबा रकम गत आइतबारकोे तुलनामा ४ करोड बढी हो ।
अर्कातर्फ बजारमा दिनप्रतिदिन सेयरको आपूर्ति बढ्दै जाँदा पनि बजारले गति लिन सेकको छैन । अघिल्लो साता मात्र नेप्सेमा ३७ लाख बढी कित्ता सेयर थपिएको थियो । अझै गतबर्षको बोनस तथा हकप्रद सेयरहरु समेत थपिने क्रममा रहेको छ ।
आजै सिद्धार्थ क्यापिटलले लिलामीमा राखेको २४ कम्पनीको एक लाख बढी कित्ता सेयरका लागि आवेदन गर्ने अन्तिम दिन भएकाले पनि केही ठुला लगानीकर्ताहरुलाई दोस्रोबजार बाट अक्सन मार्केटमा तानिएकाले पनि दोस्रोबजारको कारोबारमा बढोत्तरी हुन नसकेको समेत आँकलन छ ।
यसदिन कारोबार आएका सबै समूह घटेका छन् । सबैभन्दा बढी जलविद्युत समूह सय अंकले ओरालो लागेको छन । त्यस्तै बजारमा सबैभन्दा धेरै हिस्सा रहेको वाणिज्य बैंक समूह १२ अंक बढीले ओरालो लागेको छ ।
यसदिन सानिमा हाइड्रो सबैभन्दा धेरै ५ करोड ४५ लाख बराबरको सेयर किनबेच भयो । दोस्रो उच्च कारोबार हुने नबिल बैंकको २ करोड २९ लाख बराबरको कारोबार भएको छ ।
यसदिन एनआइबिएल प्रगति फण्डको इकाई मुल्य सबैभन्दा धेरै चार प्रतिशतले बढेको छ । त्यस्तै महुली लघुवित्तको सेयरमूल्य पनि करिब तीन प्रतिशतले बढेको छ । सिन्धु विकास बैंक, चिलिमे हाइड्रो पावर र बुटवल पावर कम्पनीको सेयरमूल्य सात सात प्रतिशतका दरले ओरालो लागेको छ ।