क्यापिटलले गत मंगलबारदेखि एक अर्ब बराबरको सामूहिक लगानी कोषको दश करोड इकाई बिक्रीमा ल्याएको हो । क्यापिटलका अनुसार मंगलबार, बुधबार र शुक्रबार गरी तीन दिनको अवधिमा करिब ७ हजार आवेदकबाट २७ करोड बराबरको आवेदन परेको छ ।
क्यापिटलका प्रमुख कार्यकारी अधिकृत समिर दाहालले शुक्रबार १२ बजेसम्म उक्त परिमाणको आवेदन परेको जानकारी दिए । 'अहिलेसम्म व्यक्तीगत लगानीकर्ताको मात्र आवेदन परेको र संस्थागत लगानीकर्ताबाट आवेदन आउन बाँकी रहेकाले आइतबारसम्म म्युचूअल फण्डले निष्कासन गरेको एक अर्बको इकाईको लागी आवश्यक आवेदन पर्ने विश्वास छ , दाहालले भने ।
क्यापिटलले १० रुपैयाँ प्रतिइकाईका दरले १० करोड इकाई बिक्रीमा ल्याएको हो जसमध्ये १५ प्रतिशत अर्थात् एक करोड ५० लाख इकाई कोष प्रवद्र्धक सिटिजन्स बैंक इन्टरनेशनल लिमिटेडलाई र बाँकी आठ करोड ५० लाख इकाई सर्वसाधारणका लागि छुट्याइएको छ ।
कम्पनीका अनुसार प्रतिइकाई १० का दरले न्यूनतम १०० इकाई अर्थात् १०० रुपैयाँ र अधिकतम २० लाख इकाई अर्थात् दुई करोड रुपैयाँ बराबरको आवेदन दिन सकिनेछ ।
क्यापिटलले ल्याएको सातवर्षे बन्दमुखी यो सामूहिक लगानी कोषमा छिटोमा माघ ७ गते आइतबार र ढिलोमा माघ १७ सम्म आवेदन दिन सकिनेछ । सबै ईकाई बिक्री भएमा माघ ७ गते बिक्री बन्द हुनेछ भने निश्काशन गरिएको भन्दा कम माग भएको अबस्थामा माघ १७ गतेसम्म आबेदन खुल्ला रहने कम्पनीले जनाएको छ ।
तोकिएको रकम एक अर्ब रुपैयाँ भए पनि लगानीकर्ताको माग आवेदन बढी भएमा कोषको आकार २५ प्रतिशतसम्म बढाउन सकिनेछ ।
सात बर्षे अवधिको उक्त म्युचुअल फण्डले औसतमा साढे २२ प्रतिशतका दरले वार्षिक प्रतिफल दिने लक्ष्य लिएको सिबिआईएल क्यापिटलले जनाएको छ ।
यो सीबीआईएल क्यापिटलको पहिलो म्युचुअल फण्ड हो । यसले पनि ईकाई बिक्रीबाट संकलन भएको अधिकांश रकम सेयर बजारमै लगानी गर्ने जनाएको छ ।
सि.बि.आई.एल क्यापिटल सिटिजन्स् बैंकको सहायक कम्पनी हो । सि.बि.आई.एल क्यापिटलले शेयर निष्काशन तथा विक्री प्रबन्धक सँगै, लगानी व्यवस्थापन (पोर्टफोलियो म्यानेजमेन्ट), निक्षेप सदस्य (डीपी) सेवा, लगानी परामर्श सेवा प्रदान गर्दै आइरहेको छ ।